有閒錢嘅話，買層樓收吓租，都咪話唔疏乎。不過，點樣揀租客，係一門好深嘅學問。近日喺《香港討論區》上，有網友就問到︰「身為業主點樣揀一個好租客？」唔少網民都提出意見。
cicjy話，佢自己會從多方面考慮，包括「職業、年齡、單身或couple、性別。」
blackh2005就強調，一定要揀有穩定職業嘅租客，而喺佢眼中，教師、公務員（警察除外）、醫護人員都係好租客。
網友fwho就認為，行行都有斯文敗類，況且要搵從事專業工作嘅租客，亦唔係咁容易。所以佢認為，「睇吓佢做嘅工作有冇前景啦，如果係嗰啲低技術人員，你分分鐘收唔到租；冇細路就更加好，唔會破壞間屋；冇貓狗嗰啲又好嘅。」
至於chumui211嘅揀「客」條件，係謝絕單身，只會租畀夫婦。佢仲講︰「如果佢哋畀埋個卡片你，減多少少又點話！」
唔同嘅業主，對「好租客」都有不同嘅準則，不過講到尾，做業主嘅，都係想租客有租交啫，所以退休軍人精警回應一句︰「咩嘢都係假，總之準時交租，就係好租客。」