由黃毓民、長毛同麥國風等牽頭嘅社會民主連線，終於趕及喺國慶日正式成立，仲搞咗個大型造勢音樂會，都有成千人出席。
雖然埋咗幾個月班，但啲人腳睇落同幾個月前冇大分別，唯一有少少驚喜係傳染病醫生勞永樂棄暗投明，投奔民主派陣營，成為社民連嘅創會成員。勞永樂話，擦鞋仔多你一個唔多、少你一個唔少，不如做啲實事去爭民主好過啦！
勞永樂入社民連都令人有小小意外，話晒佢連7.1都冇出嚟遊行，喺立法會時又唔見佢支持普選，23條立法時又話要睇醫生意見，近年又出席唔少民建聯活動，八方都估唔到佢竟然入埋啲「反動」組織。但點都好，有多一對手爭民主都係好事，所以毓民都讚佢「實迷途其未遠、覺今是而昨非」，唔知佢日後會唔會幫長毛抬棺材呢？
「香港太多右派」
當年立法會整沙士報告，勞永樂同麥國風被懷疑係洩密元兇，結果佢兩個俾人叫做「麥當勞」，最後仲雙雙落選立法會，估唔到事隔三年，「麥當勞」又喺社民連重組。勞永樂話，佢唔會點諗再選醫學界啦，話晒功能太窄，往往違背大眾利益，至於直選同區議會，佢都唔會諗住，點都要有群眾基礎先可考慮。
毓民搵埋散咗band嘅LMF同黑鳥樂隊嚟夾band，其間一度話beyond嘅黃家強會嚟，但最後都冇見人。民主派呢，唔計長毛同大嚿，民主派議員得卿姐、張超雄同大班嚟恭賀。張超雄話，香港實在太多右派，有個真正嘅左翼組織係好事，至少可以戥勻啲。