前排天氣唔錯，點知西貢各界國慶籌委會好揀唔揀，揀咗噚日一個下雨天，喺區內一個露天硬地球場搞咗個《認識我的祖國嘉年華》嘅國慶前活動，請得中聯辦新界工作部副處長曾海繁及一干人等出任嘉賓熱鬧一番；亦都係咁，佢哋個個就齊齊變晒落湯雞。
其實原本話噚日兩點半進行開幕儀式，點知等到成接近3點至開始，當司儀叫啲主禮嘉賓就坐時，原本係冇雨落嘅，突然間天公嚟料，落場大雨，搞到班人好狼狽，最後決定返回觀眾席大帳幕避雨，遲啲再開幕。其間有人向籌委主席麥顯坤大叫，點解慳幾百蚊唔買燒豬拜吓神？不過有人反駁，話貴人出門招風雨之類嘅好說話。總之，一句講晒，西貢呢個國慶前奏真論盡。