鄧麗欣潮吃蛋黃
「中秋節就梗係食月餅，不過我唔係食傳統月餅，雖然自己好鍾意食蛋黃，但就唔鍾意食蓮蓉，所以𠵱家我就會食一啲新潮月餅。好似冰皮月餅、雪糕月餅咁，反正新潮月餅好多都係細細個，所以一次食兩個都唔擔心好肥，我都係當雪糕、零食咁食囉。至於以前中秋節，我都會玩煲蠟，不過試過有其他男仔煲煲吓突然小便，真係好危險，搞到我以後都唔敢行近去。」
應節食物：雪糕月餅
陳慧琳慶賀團圓
「我喺中秋節最鍾意嘅食品係芝麻湯圓，我鄉下係上海，其實所有節日屋企都一定有湯圓，因為有團圓嘅意思，非常好意頭。芝麻湯圓裏面嘅芝麻餡同酒釀湯圓裏面嘅豆沙餡都係我嘅至愛，不過就多數會買現成嘅返嚟煮，因為自己喺屋企整湯圓都幾花工夫。」
應節食物：芝麻湯圓、酒釀湯圓
關心妍貴價蜜柚
「中秋節我一定會食沙田柚，因為老闆娘梁芷珊介紹我喺跑馬地買嘅沙田柚好好食，喺馬來西亞嚟，都要賣成40幾蚊一個，而且佢嘅味道唔同一般沙田柚，係有蜜糖味，所以中秋節一定會掃一箱返去食，一來可以消滯去油，二來食完之後，我仲可以將啲沙田柚皮做燈籠，一舉兩得。每年中秋我都會食月餅，特別係奶黃月餅，我最勁係一次過食6個月餅。」
應節食物：沙田柚、奶黃月餅
何韻詩補償童年
「我鍾意食月餅，細個時喺加拿大冇得食呀，因為嗰度啲月餅價錢貴香港成四倍，我一家人好少買嚟食，最多買一個全家分，之後返香港咪食番多啲囉，不過我近排籌備演唱會，要節食。其實月餅一定要雙黃蓮蓉先最好食，因為啲油啱啱好滲入啲蓮蓉度，又香又甜，單黃太單調，四黃又太滯啦。」
應節食物：雙黃蓮蓉月
劉浩龍親情甜柚
「我鍾意食沙田柚，因為除咗健康外，最主要係我細個時，嫲嫲好鍾意將啲沙田柚嘅皮整成燈籠畀我玩，有得食又有得玩，一舉兩得。同埋我唔食得太甜嘅嘢，所以好少食月餅，中秋會食多啲生果，林柿同水晶梨都好好，呢啲時果味道特別，中秋先最多，咪食多啲囉。」
應節食物：水晶梨、沙田柚
蘇志威月餅專家
「我最鍾意食月餅，仲要一定係雙黃蓮蓉嗰隻，月餅最重要係蓮蓉啲味做得好，甜度要適中，又要有口感，如果太過甜就唔好味嘞。雙黃的蛋黃油流少少落啲蓮蓉就最好食，我最鍾意切成四角或者八角食，如果心情好，咪食大啖啲囉！話晒一年先得一次中秋節，真係唔好理咁多（指肥膩），食咗先算，最多好似我咁，食完做多啲運動咪冇事囉！」
應節食物：雙黃蓮蓉月
陳小春回鄉食柚
「我鍾意北方嘅碌柚，特別香、甜、多汁多水，香港嗰啲好亁，有啲仲酸嘅。我有時中秋節會同家人返鄉下食㗎，一家人食完飯食個碌柚，再去放煙花就好正。我仲推介中秋一定要食湯圓，取好意頭，人月兩團圓嘛。最緊要一全家一齊圓埋，開開心心啦！」
應節食物：北方碌柚、湯圓
古巨基喫糕燒蠟
「每年中秋我都會食蘿蔔糕應節，因為我媽咪會親手整，我都會幫手刨蘿蔔，不過我因為手汗太大，所以俾媽咪嫌棄，刨出嚟成堆蘿蔔水汪汪。其實每年中秋我都會盡量抽時間同屋企人食飯，以前就會玩吓蠟燭，不過𠵱家就因為犯法，所以都冇玩，但係我記得細個玩蠟燭時，燒穿褲都唔知，仲露出八月十五，認真應節呢。」
應節食物：蘿蔔糕
採訪：駱華齡、王連連
