環新（502）係香港唯一之可可豆貿易股，有超低PE墊底，嚟緊日子可炒幾轉。環新06年度中期（6月止）純利增長16%到4726萬銀，純利增長主要係其他收入（估計應該係紅簿仔利息）帶動。但要咁睇，環新可可豆主打採購地區印尼，收成期以9月到12月最醒神，所以，環新應該一如往年，下半年度先係發力期。環新往績PE得3倍幾，06年度純利如保持12%增長，去到1.25億銀，就算因為上年配股攤薄效應全面反映，06年度PE講緊都係3.6倍，殘到痹。
嚟緊日子，吼實環新第三季度及年度業績期，已經可以炒兩轉。又呢期有外電話，環新考慮緊星洲或以外地方上市，集資搞可可豆加工廠。環新計劃撈埋下游高增值業務，絕對啱路數。而環新一落實外地上市消息，相信又係股價催化劑。呢期落場當熱身，博環新見7月高位0.6元，潛在回報率26%。
一拖產品No.1
一拖（038）生產嘅「東方紅」拖拉機，呢期獲國家質檢總局評選為中國名牌產品NumberOne之列。一拖唔單止食正扶農國策，產品又有相對優勢。照咁睇，一拖應該可以乘住06年度中期虧轉盈（賺咗3052萬銀人仔）之勢，全年度純利可以更上層樓。
又一拖NAV2.5港銀，現價（1.64元）折讓34%，係同類股中最平。以一拖1倍P/B計，股價上番2.5元，潛在升幅翻半番。呢期個市急抽直插，吼實1.5元撈底。