咪誤會，着功夫褲唔代表識打功夫，「面譜」老闆揀功夫褲做員工制服，只係想間舖頭多啲古典味，經理話：「呢度唔少客人都係遊客，佢哋好嚮往中國文化，侍應着功夫褲Serve佢哋，佢哋會開心啲。」下身呢條功夫褲，褲腳無束起，反而做得闊身啲，做起嘢嚟零舍方便，而上身則係一件印有面譜圖案嘅長袖Tee，不過我就有啲奇怪，點解一間食四川菜館會用面譜做主題呢？「老闆開呢間餐廳之前，曾經去過四川實地考察，發現面譜唔係源自北京，四川先至係起源地，於是咪攞咗嚟做主題囉。」侍應生Jason話：「好多客人都讚過我件Tee靚，仲買番幾件當手信㖭（每件$150）。其實套制服都好得意吖，一般餐廳嘅制服都好正經，我套制服就印晒面譜公仔，望落都幾趣致。」採訪時，Jason擺出耍功夫Pose，坐喺旁邊嘅外國遊客拍晒手掌大叫：「VeryGood！」外國人，真係咁鍾意中國功夫？
記者：黃若茵
攝影：陳陶鈞
京式醬爆三絲$85
三絲分別係甘笋、竹笋同埋豬肉絲，入口有爽有腍，味道則帶甜，食完辣嘢啱食呢道菜。
尖椒爆雙脆$98
紅青指天椒、子彈椒、亁辣椒、青泡椒落鑊，加海蜇同珊瑚菌一齊炒，辣味甚重。唔怕辣嘅，一定要食埋各種辣椒。
麻辣牛肚$52
牛肚唔韌，加蒜茸粒一齊煮非常爽口。辣度屬中等，入口舌頭先感到陣陣麻辣，然後先慢慢辣落喉嚨，送酒一流。
面譜（23119233）
地址：尖東火車站33號地面
註：以上菜式於10月中推出