一孩政策之下，國內家長再愛國也不會叫孩子做「向陽」了。國內也作興為金叵羅改個風水靚名，結果考起老師。點名時滿眼是拗口的「俁揚、荊燚、沛錙、以韡、均苡」。更難咀嚼的還有火字配民，兩個土字做名字。這些超新字令電腦「輕」機，學校大感頭赤。
朋友的孩子大阿仔兩歲，叫張弛，很有戲劇感。大阿仔六到八歲的，叫知行和樂行。大半歲的，叫黎善。跟阿仔同齡的，叫謝朗。幼兒班裏的同學，咁高咁大，最能夠看到「潮流」。同期人仔似乎時興開火，男女都有很多的熙、熹、曦、烯。○四肖猴，猴屬金，幼兒班裏鮮見小伙子名字穿金戴銀的。這樣也好，家長到底知足，真金不怕洪爐火，大概是想孩子頂得住亂世洪流，金火代替甘苦，跟足一世，總算好意頭。
有些字忽然走紅，有個時期，女的踴躍叫阿彤，一個場合曉彤、影彤、彩彤撞到正。後來就改做潼或者童，明顯地，睇名字就知，潼是彤姨的後輩。英文名字一樣追時髦，今天還叫孩子做Johnson的家長實俾叔伯兄弟打一身。網上經常有嬰兒靚名提供，鬼佬同樣迷信靚名能轉運，衰名冇人吼。聽聞二字頭出生的人仔絕少叫做Jose，從南往北移，名字帶點德意志冷僻的最紅。像Ludwig、Wolfgang、Brigitta。是否有點眼熟？正是奧地利那樁哄動的禁室疑案裏的重要人物的名字。你猜猜哪個屬於綁匪。