全球目光投向中國，08北京奧運、世博，注目的早已不只在十．一國慶的今天。在這股熱浪中，97年十大傑青陳瑞麟從香港出發，以「中國珠寶品牌」為終極目標，走向世界。由張曼玉（Maggie）一手戴紅的葫蘆、天地系列，到今日如Barbie般可換衫的熊貓頸鏈，陳瑞麟有齊香港人勇於嘗試、西方思維與植根內裏的中國心，他直言「生得逢時」，幸運遇上一個中國年代！ 撰文：林妙萍
被稱為「葫蘆之父」的十大傑青陳瑞麟，因97年的一次絲路之旅，翻起血脈裏的中國心，成功創立珠寶品牌Qeelin，由禮品設計師變作珠寶設計師，全靠啓蒙的內地之旅。
陳瑞麟重提此事仍然感觸激動地說：「我同太太May鍾意去旅行，去過北極、東歐周遊列國，97年回歸後先的起心肝，第一次返內地踏足北京、上海，好有新鮮感，只係覺得好玩，後來去到絲路，睇敦煌石窟，見咁宏大豐富嘅文化寶庫收埋喺山洞覺得好可惜。」
反映大中華特性
陳瑞麟續說：「之後我成日諗，中國喺世界冇一個珠寶品牌代表，又冇品牌反映我哋民族文化風格，你睇，日本有mikimoto珍珠、意大利Bvlgari保留咗當年中古歐洲風格、Cartier充滿法國美學，偏偏中國五千年文化就冇一個代表！由此勾起咗我作為中國人嘅一顆心同少少抱負，以『中國品牌』為目標出發。」
做中國珠寶，陳瑞麟沒有做外國人一眼認得出的大紅金龍、黃金萬両，讀設計的他不斷從線條出發，葫蘆外形、天圓地方的概念雲集設計中，由97年至今畫了1,200件作品，兩年來卻只出了三個系列，他說：「我哋決定咗唔走新派珠寶路線，而係將中國文化融入時尚設計之中。」
吼準機會展拳腳
中國市場大，中國風設計不時可見，陳瑞麟卻從不擔心，他說：「各大品牌做中國嘢係一個熱潮，唔係一個方向，好似04年卡地亞同葫蘆同一年出籠做主題嘅kissofdragon，YSL服裝上都係大龍大鳳。呢個係機遇，𠵱家係當代中國人發揮嘅時候，係perfecttiming，𠵱家係真真正正嘅中國年代！Omega幾十年前有上太空嘅錶，我哋中國今日都有自己上太空嘅錶，我相信，若果唔係呢個時間創立、出發，或者就冇呢回事。」
全球名牌搶攻內地，《國際先驅論壇報》形容Qeelin為有雄心及膽識走向世界的中國品牌，陳瑞麟直認大膽說：「香港人嘅優點之一就係敢試，我喺香港長大，04年推出嘅時裝我都揀Cityofluxury：巴黎發表，敢於喺世界競技場上企出嚟，就係對自己設計嘅肯定同信心。」
腦震盪刺激思維
Qeelin的茁壯長大，最功不可沒的還是長期半義務的形象女神張曼玉，她在04年年中康城影展上戴上一條當時仍未公開發表的葫蘆鑽石項鏈，從全球人好奇探索中成功掀起熱潮。其後，曼玉大露背演繹的「天地」系列、熊貓「BoBo」系列，日前，她又戴住尚未公開曝光的「陰陽葫蘆」系列主持香港文華東方酒店開幕，她與Qeelin血脈相連，陳瑞麟說：「Maggie係我嘅muse，佢好有東方味，但同時又非常international。我哋成日傾偈、見面期間腦震盪對方嘅思維。」
Qeelin今晚在巴黎推出新的「FashionBoBo」系列，靈感正是來自張曼玉，陳瑞麟說：「出咗以熊貓為靈感的BoBo後，Maggie有一日問我點解熊貓冇衫換，佢由時裝人、女性角度出發，但激發出呢個有泳衣、裙仔嘅新系列。」
攝影：仇志德
