荷李活興三部曲，明明長出長有嘅《X-Men》都搞番個小終結；嚟到第三部曲《TheLastStand》，忠奸兩派主要角色超過14人，各有特色兼打到七彩，磁力王抽起金門大橋當飛機，點知都唔夠死過翻生嘅靈鳥勁，CG特技天馬行空，觀眾睇到眉飛色舞，LastStand？邊有咁易呀！
記者：徐影龍
三版本賀靈鳥翻生
雖然到截稿前港版3區《X-Men3》仍未派貨落場，不過單睇其他電影發行商避戰，已知《X-Men3》必定熱賣！得利影視亦為此谷到盡，推出版本可算歷代最多嘅一次；雙碟特別版、漫畫珍藏版、三部曲BoxSet等三大版本，仲有款唔同封面、稍遲推出嘅雙碟限定版，計埋VCD版等，簡直就係賀靈鳥翻生！
雙碟特別版/$175
港版3區不會推出單碟版，故呢套已係最平DVD版。
StanLee漫畫珍藏版/$225
電影內容同Bonus冇變，換咗封面及附送100頁漫畫，由原創人StanLee全新繪畫，日後必炒！
三部曲BoxSet/$300
一氣呵成睇晒三集，除開計每集只係$100，好抵。
另類結局：狼人回到起點
今次港版3區最抵讚，畫面拍住1區質素，色彩層次及打鬥畫面流暢，唔會出現港版壓碟嘅「狗牙」情況，聲效支援DDEX、dtsES兩大6.1環迴制式，壓軸360度毀天滅地一幕最明顯！Bouns亦豐富到爆，製作特輯同特技解構超過兩粒鐘，睇過先知特技逼真唔係一味靠CG，搭景、爆破、化妝同威也先係幕後功臣，準備工夫嚇死人！另收錄兩段「另類結局」，第一段係X-Men大本營重新開學，比電影版稍長；較有睇頭係狼人回歸加拿大一段，重返當年被改造後失去意識、靠打擂台維生嘅酒吧，仲同老闆攞咗支啤酒飲㖭，作為三部曲終結，呢幕其實幾有味道。
金門橋飛天不簡單
今集講Dr.Jean復活，邪惡潛意識靈鳥身份蒲頭，5級威力全球最勁（磁力王都係3級咋！），不過輪場面鋪排，點都唔及磁力王抽起金門大橋咁有氣勢！為咗令兄弟會大軍殺入惡魔島搶人，磁力王不惜強行抽起金門大橋，自行「搭路」過惡魔島，認真有派頭！
ＣＧ解構全面睇
十米模型度景
根據StoryBoard同3D圖像，先砌個小模型度位，全長十米已屬小兒科。
1:20超巨場景
將其中一段製作成1:20超巨場景，橋樑結構同細節跟真嘅一樣，全長25米。
兄弟會踩場
拍下磁力王指揮兄弟會大軍殺入惡魔島片段，留待合成之用。
結合影像
利用電腦將實景、模型、真人結合，再用CG加入碎石、灰塵等效果。
大功告成！
多個場面可列經典
