「伊莉沙白」最近俾公司雪藏，公司話佢唔聽話，份人又寸同埋試過兩次失場，究竟伊莉沙白係咪真係咁寸，關仁就唔係好清楚，不過就聽過佢份人好倔強同好有性格。佢公司藝人向來都會去某間夜店應酬，但係伊莉沙白就從來都唔肯去，覺得自己冇必要做呢啲嘢，喺呢一方面，關仁都好欣賞佢嘅。
歌仙出碟苛刻告吹
「歌仙」自從早年開完演唱會後，好似人間蒸發咁唔見咗人，原來早排佢日日匿埋錄音室搞創作，作曲又作詞之外，仲搵咗幾個之前佢栽培嘅「魔鬼」同佢一齊錄新歌。關仁聽聞歌仙大碟嘅新歌已經全部錄好晒，點知佢搵唱片公司同佢出碟，傾咗幾間都傾唔掂，原來歌仙除咗要求多多，要人哋落本搞宣傳之外，講明自己唔會現身出席任何宣傳活動，咁蝕底嘅事，人哋梗係唔制啦！
超級富豪車牌防身
超級富豪投咗個「我L你」車牌，好多人話呢個車牌係用嚟送畀佢嘅舊愛美人女星，其實呢個係美麗嘅誤會，因為佢都唔係儍仔，明知美人女星同富豪公子「蚊蚊」打得火熱，又點會喺呢個時候做蠢事呢？佢投呢個車牌，只不過係用嚟防身，以備不時之需啫，因為唔知幾時用得着。大家都知，佢份人咁浪漫，咁識𠱁女仔，如果送個咁嘅車牌畀女朋友，仲唔冧死對方咩？
Textby關仁