近幾年大學界都吹着一股「北風」，八方指係多咗好多內地生自費嚟香港讀大學，唔止教學上要有內地因素，城大噚日出版嘅一本畀香港社工睇嘅新書《堅守信念──給社工學生的30封信》，講明部份篇章係特別為內地社工學生撰寫嘅，教佢哋點樣為投入社工專業做好準備，咁識睇市場需求，城大睇嚟好有遠見。
講番呢本書，係由城大21位社工教師執筆，以書信形式同學生、校友、社工細談實踐體會，為喺面對改革浪潮同挑戰嘅社工學生及前線工作者打氣。城大話近年社會問題同改革，為社工界帶來種種衝擊，於是對社工本質及信念產生懷疑，呢本書就係打着「信念為本」為起點，由教師重申社工本質、信念、理想同價值觀嘅重要性。城大提供圖片