電影《夜宴》前日喺北京舉行慶功宴，慶祝套戲內地票房報捷，章子怡、葛優同周迅都有出席。繼上月初威尼斯影展章子怡着嘅GiorgioArmani禮服，徐靜蕾9月喺香港出席《傷城》記者會時已經着過外，前晚佢着嘅彩色禮服，早喺去年11月台灣金雞百花電影頒獎典禮時，有小章子怡之稱嘅張靜初（右圖）已經着住嚟行星光大道，章子怡足足遲咗成年先着，真係𤓓到爆。
另外內地記者問導演馮小剛點解套戲以香港片名義報名奧斯卡最佳外語片，馮小剛話因為套戲同香港寰亞合拍，又符合至少六個主創人員嚟自香港嘅要求，但記者對呢個答案就唔係咁滿意。再問佢對張藝謀嘅《滿城盡帶黃金甲》以內地片名義報名奧斯卡有乜嘢評價，馮小剛就話奧斯卡唔係體育比賽，所以講唔上係角逐，兩套戲都只係報名，都未入圍，所以話佢哋對撼為時尚早。