香港人去澳門最鍾意食葡國菜，不過我好記得有個地道澳門人同我講過：「喺澳門，出名嘅葡國餐廳多數都名過於實。」所以一係唔介紹，要推介就不如揀間名不經傳嘅。「家樂舍」老闆娘本身係葡國人，做嘅係正宗葡國家鄉菜，特色多士點解叫法國靚女？法國靚女斬件又點解會變成廚師拼盤？想知就邊食邊聽老闆娘講古喇。
記者：黃若茵
攝影：林栢鈞
模特兒：KaKi
朋友鼓勵開餐廳
澳門通街葡國菜館，「家樂舍」有乜特別先？其實睇店名已略知一二，老闆娘Manuela話：「我家鄉喺葡萄牙北部，餐廳做嘅菜式，多數係我外婆同媽媽做開嘅家常菜，我希望客人嚟呢度食嘢，感覺就好似喺屋企開飯，而唔係去餐廳食飯。澳門大部份葡國菜館都地道化晒，遷就晒香港同澳門人口味，並唔係正宗葡國菜。」採訪當天，Manuela有唔少朋友在場，其中一位朋友曾小姐話：「以前Manuela成日親自下廚，請我哋去佢屋企食飯，所以我哋鼓勵佢開間餐廳，𠵱家終於夢想實現，可以將咁有家鄉風味嘅葡國菜同大家分享。」
菜式一定要熱食
講咗咁耐，究竟葡萄牙北部家鄉菜食乜嘅呢？Manuela話：「葡萄牙北部鄉村位於山谷位置，唔近海，所以當地人就食大地提供嘅資源，蔬菜、豆類同豬肉都係主要食材。」除食材外，食家鄉葡國菜記得留意溫度，乜菜式都好，一攤凍就唔好食，「因為山谷地方比較凍，所以菜式一定要熱食先好味。」就喺佢催速之下，我邊將熱辣辣大大件嘅特色多士吞落肚，邊聽佢講每道菜嘅起源故事，呢餐個胃運動唔少之餘，知識都增進唔少呀。
1.特色多士$75
Manuela講古：「以前好多葡萄牙人過法國打工，同法國人生出嚟嘅下一代混血兒好靚女。某次有班葡國人喺酒吧講起混血靚女，大廚突然話：『我介紹個法國靚女你哋識。』轉個頭就攞咗呢個特色多士出嚟，自此呢種多士就叫『Francesinha』，葡文解『法國靚女』。」麵包夾住葡國腸同牛肉，面層鋪芝士，配用啤酒同海鮮調校嘅醬汁食，少少辣好香口。
2.廚師拼盤$45
Manuela講古：「『法國靚女』好受葡國人歡迎，不過份量實在太大，後來有人用相同材料，但減少份量，就演變成呢個拼盤嘞。」麵包切成一小件，上面依然鋪番層芝士，而原本放喺麵包入面嘅餡料亦切開細細件，食得更方便。
3.豬肚三角豆$75
Manuela講古：「18世紀法國人侵略葡萄牙，搶晒我哋嘅食物，後來英國人幫我哋趕走侵略者。我哋想煮餐好嘅答謝英軍，但食物被人搶晒，惟有用剩番落嚟嘅豬內臟，同啲豆煮埋一齊，答謝戰友。」澳門一般葡國餐廳會用牛肚，但最正宗做法應該用豬肚煮三角豆，食落少甜，豬肚非常香口。
4.薯絲馬介休$75
Manuela講古：「住山谷，離海好遠，好難食到新鮮魚，所以醃過嘅馬介休就係我哋經常食嘅魚，唔少葡國菜式都用馬介休㗎！」馬介休同薯仔切絲，加洋葱、香草一齊炒，香味四溢，薯仔炒至亁身反而更惹味。
5.雞蛋布甸每件$25
Manuela講古：「以前舊式葡萄牙家庭，朝早會做定呢個雞蛋布甸，到咗夜晚一家人分嚟食，好溫馨㗎。」有如一貫歐洲式甜品，甜味好重口感好滑，嗜甜女生咪錯過。
6.炭燒葡腸$30
Manuela講古：「以前喺鄉村，我哋冬天前會做定多啲香腸，然後掛上天花板，備用過冬。」上碟，碟底有沾過火酒嘅棉花，撻火，燒至香脆就可以食喇，不過唔好燒太耐，好易燒燶㗎。
食客有Say
Selenge：「我老公係葡萄牙人，住咗澳門4年，呢間係我試過最好食嘅。」
Anthony：「我係葡國人，呢度嘅菜式好有Homemade感覺。」
Tuya：「我係蒙古人，經常食葡國菜，覺得Manuela做嘅菜好健康。」
搵食攻略
家樂舍（853-753477）
地址：澳門皇朝廣場羅馬街恒基花園第三座地下AE舖
營業時間：11:00am-3:00pm，5:30pm-11:00pm
座位：56個
交通：碼頭乘的士約$17
人均消費：$80-$100
最好賣：忌廉馬介休