星期二講Q.F.（QuantitativeFinance計量金融或計量財務）畢業生搶手，人力專家Ｎ立即打電話嚟：「你講得冇錯，你識得咁多人，如果有世姪世姪女讀呢科嘅話，即刻介紹畀我，我請你食飯！」
食飯咁少嘢？好似話銀行請人有介紹費喎。人力Ｎ講到：「QuanFin畢業生，一有即搶！」甚為豪氣，乜唔係啫，佢年幾前加入一間以衍生工具、直接投資而著名嘅銀行，為時尚短，但在此期間，人力Ｎ晉身為HR阿頭，要睇住嘅國家竟然由四個增加至超過二十個，生意範圍急劇擴充，故此人力Ｎ成日話搵唔到啱用嘅人。點樣先至算啱用？第一優先係QuanFin生，第二係數學叻嘅數學系、工程系畢業生。重有一樣，係創意十足。人力Ｎ話：「我嘅工作職能只係寫咗一半、另一半空白，任我諗project！」咁巴閉？左丁山特登話：「肥仔Ｋ在美國畢業，英國碩士，日本研究生，只識歷史政治，識講古仔。中英日三文四語，數學差勁，不懂會計財務，呢類人你請唔請？」
人力Ｎ諗咗一諗，話：「呢類人應該有國際視野，香港仔，美國讀書，英國日本經驗，背景好唔錯，如果識諗到一啲新project，我哋會請㗎！」佢話銀行內不少同事會在自己工作範圍之外，多提意見，諗新嘢，如果畀高層接納，另有獎賞咁話。
𠵱家銀行金融好景，人人恨做華爾街。律師Ｈ嘅千金在紐約哥倫比亞大學讀德國文學，唔會坐車去downtown搵工啩，不過，據律師Ｈ講：「哥大有十位工程學碩士，一畢業就去咗華爾街，冇人肯去工業公司。」美國工業啲工程職位留番畀邊個做？答案好簡單，IC囉，IndianandChinese也。化學專家教授Ｗ講，喺美國讀化學工程嘅博士生以亞洲人為多數，美國年青人𠵱家重環保，輕古老工業，大學要招收白人學生讀化學工程博士，唔係咁易。中國人讀化工一定最叻，做假雞蛋、假豉油話都冇咁易，唔讀化工，嘥晒。