「學校似平治車廠，實用又穩陣，我就似法拉利，將資金投放於教學，我預備課程時，睇勻有關資料、分析報告……將高科技加入教學，例如轉晒LCD、老師桌上的布置或紙巾擺位，都精心設計過。」KenSir笑說，買車和做老師也要進步，由昔日玩寶馬到今天迷上法拉利，他認為車的哲學對做老師有很大啓發，所以他等了兩年，買下連改裝約$3,000,000的F430。
記者：陸伊琳
攝影：林栢鈞
同現代教育KenSir做訪問發生好多個意外，首先是天氣問題，訪問一改再改，第三次先成功；二是他叫我唔好用甚麼補習天王來形容他，提議用「英文名師」這個稱呼會較貼切，心想：「人人都自居為補習天王，你也算補習界始祖，但卻不喜歡這個稱謂，奇怪。」只怪通街都是補習天王！
買了一部連改裝約$3,000,000的F430，但KenSir說只想低調一些。事實上，他不如其他傳媒所報道般沙塵白霍，就連我小小的要求：「不如揸你架新嘅法拉利F430去旺角走一轉，同現代教育嘅學生合照？」他也推卻這個免費宣傳。「唔好喇，我好低調，喺我屋企附近搵個靚景影吓咪得囉，嗰條直路好靚㗎。」（KenSir的家是市值千萬的紅山半島）他的細心反嚇壞我，預料他會滔滔不絕的ShowOff，但竟換來如此的和諧訪問，不過好想對你講：「你揸$3,000,000的法拉利超級跑車，同時擁有近百萬的平治CLS，想低調真係好難。」
法拉利迷×LV迷
看KenSir很多報道，說他準會Show周身名牌，今次訪問在他紅山半島的家，他沒有故意向我展示，但我很會打量別人；他由頭到尾一身是LV、書房個LV垃圾桶、蓋着電視機條LV毛巾……招呼我們的水杯都是Versace。劈頭直接問點解會買架法拉利F430，答案不是慣常「型呀」、「夠威」等，KenSir認真答道：「我好欣賞法拉利間廠經營模式，他們會把30%資金投放落去研究車的科技發展，表現亦不斷進步，選擇頂級F430，因為佢都算係跑車界的頂級。」KenSir滔滔不絕地讚間車廠。「他們連贏10次F1，有咩車隊可以做到？他們的車真是近乎完美。」KenSir表示他揀車一定做足功夫，會睇勻晒Catalog、分析報告，好似預備課程內容一樣。
KenSir：「我學法拉利投放資源畀學生。」
法拉利似唔似現代呀？KenSir覺得似平治多啲。「實用又穩陣，有好好的服務，好似好HardSell，其實公司同車一樣都要不斷進步，我都好似法拉利咁投放番好多資源落學生到，我擺好多啱用的科技在每個班房，例如採用大量的LCD，逐漸棄用投射銀幕，令學生看得更清楚，更有效率學習，甚至老師的枱上的布置、紙巾擺放的位置等，都經過細心的設計。」
之前主攻911Turbo
「早在讀書時就有興趣研究車，揸過寶馬635csi，外形獨特，好似一件藝術品，其實車唔只用來揸，都可以用來欣賞。不過略嫌架車要成日整，動不動就一萬幾千元，其後轉投平治懷抱，感覺好好多，值得讚是平治的售後服務，整乜都免費包埋，唔係處處算住，而且實用好揸，平時代步返工都係揸架平治，假日先揸架法拉利聽吓音樂遊車河減壓。」
記得KenSir曾經也是波子（保時捷）迷，為何轉投法拉利的懷抱？「其實兩個品牌都好唔同，我揸了波子近十年，有新款追新款，主攻911Turbo，但後來玩玩吓感覺好似都係一樣，想昇華，仔細觀察，看上了法拉利，因為我好鍾意車有進步，佢哋每款的新車有好明顯的進步，揸落好滿意佢嘅表現，架車嘅性能、設計都好好，操控也好UserFriendly。」
引擎︰ 4,308c.c.V8
馬力︰ 483bhp/8,500rpm
扭力︰ 343lb/5,250rpm
波箱︰ 6Speedsequential
車價︰ $2,738,000，
連改裝約共$3,000,000
極速︰ 315km/h
驅動模式︰後驅
