雖說仔大仔世界，但謝霆鋒和張栢芝的婚事，霆鋒母親狄波拉竟然閱讀本報才得知消息，難怪她以「我痛同埋我嬲」來形容心情，連日更以淚洗面，並怪責霆鋒「唔理對方係邊個，你最緊要講聲畀我聽」，而謝賢（四哥）夾在兒子和前妻之間十分為難，他說：「你哋唔好問我好唔好！」
狄波拉前日就兒子謝霆鋒和張栢芝於菲律賓秘密結婚一事接受電台節目主持人查小欣訪問，當時她長歎一聲稱事件好複雜。拉姑因為覺得受到傷害，加上心情激動，未能接受訪問，所以昨日查小欣在其商台節目代拉姑發言。
「睇吓點平復」
查小欣在節目中說：「噚日下午1點鐘左右接到拉姑電話，佢真係唔開心，因為佢係同霆鋒好緊密接觸嘅一個媽咪，佢每日都會見謝霆鋒，而霆鋒嘅起居飲食都係由拉姑設計、打點。但係佢覺得『點解我個仔唔通知我結婚呢？』所以佢好唔開心，佢唔開心到覺得自己受到傷害，亦都驚自己同我傾偈會激動，所以佢喺自己嘅電話錄音度講咗自己嘅心聲。因為好痛，所以佢要時間去平復，令到自己冷靜啲。最痛嘅係人人都知，而佢都係睇報紙先知。」
以下是查小欣轉述的拉姑心聲：「到霆鋒真正向外界宣布，我每日都喊，一諗起就喊，我痛同埋我嬲，嬲係因為我最有資格嬲，無論個仔幾反叛、幾獨立、𠵱家幾本事，去到人生一個大事，希望話畀全世界嘅仔女知，人生嘅呢個大事，係應該同父母商量，要講畀父母聽，唔理對方係邊個，你最緊要講聲畀我聽。但到最尾，點都好，霆鋒都係我個仔，我睇吓自己點可以平復得到，而霆鋒係年輕人嘅偶像，希望霆鋒可以擺出個好榜樣。」
四哥：唔好問
記者昨日就拉姑對霆鋒隱瞞婚事而感到心痛一事致電四哥，他顯得有點不耐煩說：「呢啲係我哋嘅家事，我唔想講，總之我哋自己會處理，你哋唔好問我好唔好。」
霆鋒經理人霍汶希（Mani）昨日出席港台活動就霆鋒結婚一事說：「我都係睇報紙先知，我有打電話畀佢問佢做乜唔講我知，總之佢呢個行動唔係好多人知，我唔知拉姑唔知，佢都係想畀個surprise（驚喜）栢芝，大家都surprise。楊生（楊受成）就話會送嘢畀霆鋒。」
採訪：駱華齡、戴彩煥
攝影：馬建華、駱華齡
