如果西班牙女星彭妮露古絲（PenelopeCruz）仲未同湯告魯斯（TomCruise）分手，相信佢只會淪為荷李活大花瓶，好彩佢重投恩師艾慕杜華（PedroAlmodovar）懷抱，喺新片《浮花》（Volver）發揮水準，成功扮演一個師奶得嚟但又好偉大嘅阿媽，演技同歌藝再放光芒！ 撰文：戶川淳
西班牙鬼才導演艾慕杜華執導嘅《浮花》，入面六位主要女演員包括彭妮露古絲，破天荒喺今年康城影展入面齊齊獲選最佳女主角，套片又剛喺西班牙舉行嘅SanSebastian電影節中，奪得「國際電影影評人聯盟」頒發嘅最佳電影獎。
唔玩另類講親情
本周四（10月5日）喺本地上映嘅《浮花》，雖然冇艾慕杜華以往咁激咁edgy，故事仍然涉及亂倫同兒童性侵犯題材，全部都係點到即止，唔會令觀眾覺得難頂。呢套片可算係導演繼《論盡我阿媽》（AllAboutMyMother）同《對她有話兒》（TalkToHer）後再次向女性致敬之作，彭妮露扮演帶住春青期囡囡嘅年輕媽媽，演技入型入格，動作表情簡直係師奶到不得了，佢為咗照顧殺死鹹蟲老竇嘅囡囡，表現得好堅強，自己仲背負一段好慘痛嘅人生經歷。彭妮露仲喺片中大展歌喉，超感人!
雖然今次艾慕杜華講古仔嘅手法冇以前咁刁鑽，但唔只人物關係曲折離奇，佢描寫女性真係有計。值得留意片中做彭妮露「翻生」阿媽嘅卡門慕拉（CarmenMaura），佢演過艾慕杜華嘅《女為悅己者狂》（WomenontheVergeofaNervousBreakdown）等經典，演出抵死搶鏡。