港產女星「塊玉」自從升格做國際女星之後，成個人唔止變得國際化，連搵男友都非老外不要。自從佢同老外導演離婚後，係人都知佢𠵱家身邊有個如膠似漆嘅老外男友，仲係國際品牌高層。原來塊玉同男友邂逅過程好浪漫，話說佢離婚後長居法國，避開香港狗仔隊，咁啱𠵱家男友係佢鄰居，二人不時撞見，塊玉好嗒糖，主動同對方搭訕，二人就咁撻着，當時老外未知塊玉咁出名，知道後當然唔好嘥，周不時搵佢幫公司產品宣傳，塊玉向來愛情第一，當然乜都肯啦。
臭寸烏蠅等被杯葛
公仔箱有個新節目，搵咗20幾個妹妹仔做獎金小姐，好識借緋聞宣傳嘅「烏蠅」都係其中之一。早幾日公仔箱搞記者會，成班女仔喺化妝間扮靚見人，咁多人喺裏面走嚟走去，幾大個化妝間都會變得好擠迫，有個關仁都講唔出名嘅妹妹仔，唔覺意撞到化緊妝嘅烏蠅，妹妹仔未趕得切同佢沙冧，烏蠅已經七情上面咁「嘖」咗人哋一聲，激到個妹妹仔死死吓，烏蠅喺班妹妹仔面前扮晒大家姐，睇怕遲早俾人杯葛。
老鼠赴日無人理睬
𤓓到爆嘅「老鼠」去日本賣唱，又係搞到𤓓事成篇。話說佢演出完，走咗去睇娜姐尾場騷，喺場館門外行吓企吓博上鏡，一時接受電視台訪問，一時又主動同記者吹吓水：「各位記者朋友，乜得我一個嚟咋咩？我……」跟住下刪3,000字廢話，佢講嚟講去無非都係想等人同佢做訪問，之不過嗰晚睇娜姐騷巨星如雲，邊有人得閒理佢吖，佢未講完，記者已經全閃，真係肉酸。
Textby關仁