何韻詩叫自己做「菇」。
與菇對話，結尾語是「Leslie同明哥敢作敢為很有型！」
她聞言苦笑。
何韻詩是不是同性戀？
這個問題陳奕迅也問過，他得到的答案是：「你覺得係就係，你覺得唔係咪唔係囉。」
今天再被問起，菇的答案已不一樣：「愛就係愛，真愛可以超越時空、年齡同性別。」
畫公仔何用畫出腸。我明，陳奕迅也會明，「有緣人」容祖兒應該一早就明。
撰文：蔡如玉
菇：何韻詩 記：記者
記：父母有冇就斷背新聞問過你？
菇：我父母好開通，唔覺得係乜嘢一回事，佢哋養大我一直喺我身邊，知我係點嘅人，佢哋亦都睇得化，唔會緊張問我。
記：有冇人直接問過你係咪同性戀？
菇：有，陳奕迅囉，我答佢：「你覺得係就係，你覺得唔係咪唔係囉。」
記：係就係，唔係就唔係，咁你係定唔係？
演《梁祝》有啓發
菇：我冇必要話係定唔係。我之前會做《梁祝》舞台劇，因為我好認同個劇裏面講嘅愛就係愛，真愛可以超越時空、年齡同性別。人唔會知或者唔可以好肯定將來會點，假設有個男人結咗婚，你唔可以肯定佢以後會唔會遇到另一個男人會令佢心動。一個基嘅人，佢會唔會兩個月後又遇番一個鍾意嘅異性呢？我唔明亦都唔認同，點解大家會對呢樣嘢有咁大反應，成日問斷背嘢好無聊，我唔覺得呢啲係好犀利或者好驚人嘅事，我唔會刻意去澄清，因為我唔覺得有問題，唔想花時間去解釋。
記：如果同性戀唔敢認或唔肯認，即係自己都接受唔到自己？
菇：我唔想𠵱家我講完一樣，將來我變咗，會俾人話我講大話，以為我反悔。愛係咪要以咁嘅角度去睇？條線唔使畫得咁清楚㗎，我唔覺得需要絕對嘅答案，冇人可以肯定永遠都係點，所以我先冇正面答案，冇嘢係絕對，尤其感情，難保以後會遇到一個……總之感情唔可以劃分得咁清楚，即係你問我擇偶條件，我話要有幾高幾開朗，唔好食煙呀……可能到最後我鍾意個好矮嘅，好悲觀嘅，鍾意咗就冇辦法，呢個年代，點解大家要咁介懷去考究？
與劉浩龍共患難
記：你啲朋友知唔知你鍾意男定女？
菇：朋友就做朋友，唔使特別向朋友澄清，無論我鍾意男定女，都影響唔到朋友。
記：影響到追求者，都唔知你邊瓣，追唔追好？
菇：哈哈哈……咪嚟試吓囉！
記：有冇同劉浩龍拍過拖？
菇：你覺得有咪有囉，無論我講幾多次，大家覺得係點就已經認定咗，我點講都冇用。
記：有定冇？你講我會信。
菇：我冇！佢係我一個共過患難嘅好朋友，由《新秀》開始一齊去經歷一段難捱嘅時候，近年各有各忙少見咗，呢個朋友係我有事，佢一定會幫忙一定會出現，佢好錫我，我都會好錫佢，呢啲暗啞抵唔好俾佢知，費事佢驕傲，哈哈，佢只不過係其中一個例子，我生命中有好多呢啲朋友，未必成日見，但互相都好錫大家。
記：佢有冇追過你？
菇：你問佢啦。
記：容祖兒又係邊種朋友？
菇：佢唔同，佢好無厘頭，師兄（劉浩龍）都係《新秀》識，祖兒就無啦啦識咗，係好有緣嘅朋友，冇原因嘅，好傾得埋囉。我係個幾冇防備嘅人，同埋好易信人，我覺得我畀幾多人，人哋就會畀番幾多出嚟，我對朋友係完全信任嘅態度，我會講晒我啲嘢畀朋友知，都相信朋友會咁樣對番我，就算唔一定解決到，咪出耳仔聽傾訴囉，祖兒就係我傾心事嘅朋友。
記：有冇因為閒言影響過你哋嘅關係？
菇：到今日長大咗已經唔會，唔值得去為咗啲新聞嘛，我對任何朋友都覺得友誼比所有嘢都重要，呢啲先係真朋友。
歌迷接受能力高
記：仲有冇同傅穎聯絡？仲係咪朋友？
菇：有，梗係有聯絡，緋聞係大家一廂情願去諗，我同佢以前同公司，差唔多成日見到，𠵱家唔同公司各有各忙啫，點會唔係朋友啫？傳媒就係鍾意安好多生活細節畀我，是但啦，我同所有朋友都差唔多見得咁少。
記：曾經有傳你啲朋友都會叫Theresa（即傅穎）做阿嫂？
菇：吓？數手指個數呀？呢啲嘢我唔會理，理唔到咁多，一年365日咁多乜媽咪姐、爹哋媽，反正我覺得去睇或者去信嘅人唔係我嘅target，影響唔大。
記：你覺得愛情會唔會影響事業？
菇：𠵱家嘅歌迷比大家想像中開通咗好多，偶像嘅決定佢哋都會支持，唔好睇小啲歌迷嘅接受能力。緋聞嘅嘢你覺得會俾佢影響到，佢就會影響到，你唔care嘅，就影響唔到。
攝影：陳偉權
場地提供：都會海逸酒店
