公民黨上星期搞咗個黨部開幕儀式,雖然嗰度成2,000呎,但迫滿政商界同記者後,都冇乜位剩,有啲朋友都請唔到,所以佢哋噚日特別請咗班NGO代表去黨部參觀,順便同大家打個招呼,尤其佢哋打正旗號為公民社會賣命,當然要同相關人士聯絡聯絡至實際啦。
噚日好多環保團體都好踴躍捧場,八方仲聽聞,好鬼鍾意動物嘅息影女星傅明憲都會以動物權益代表身份出席,點知最後冇出現,令一眾行家非常失望,惟有將視線移番去現場其他人啦。黨主席關信基、黨魁余若薇、「特首候選人」梁家傑、吳靄儀、張超雄等星級主人家,當然喺齊度主持大局啦,惟獨湯家驊不在港,差咁啲啫。