為咗響應2006年度公益服飾日，滙豐同恒生噚日出動上上下下，齊齊搞新意思；相信舊年大家應該有印象，恒生一眾高層穿着中國民族服裝嘅扮相，真係好出位，唔知點解佢哋今年低調咗，只係穿上分別畫有自己漫畫肖像嘅T恤，再加上勝利手勢，都有啲Gimmick嘅，大家會畀幾多分呢？
至於滙豐總行情況又點呢？滙豐銀行執行董事王冬勝攞起結他、其他同事配以粉色POLO恤，喺中環心臟地帶，企圖想營造出一個田園feel；滙豐總行三樓大堂嘅員工，亦穿上一式一樣嘅便服，氣勢似乎不俗。
恒生話喺過去10年，連同今次活動嘅贊助同捐款，以及員工所籌嘅款項，合共捐出接近港幣1,000萬畀公益金。滙豐就話過往13年，滙豐員工同慈善基金已為公益金籌得1,400萬。據知，今年服飾日籌得嘅款項，將會用作資助公益金屬下會員機構提供嘅家庭及兒童服務。