每次見食肆玩減價，硬係覺得搵笨，例必附帶最低消費、每日限售之類嘅條款。逛女人街，見到有台式小店玩半價，點齊特色8小碟$122埋單，話就話小碟，份量一啲都唔小，6個人開餐保證食得飽。老闆威哥話：「加倍入貨，寧可賣到手軟都唔要缺貨。」咁齋食特價菜得唔得先？「得！非常歡迎。」呢啲咪叫誠意囉。
記者：朱崇德
攝影：陳陶鈞
加油膏夠台灣風味
逛開女人街都知，中間地攤係老外殺戮戰場，兩旁地舖嘅「聯合國」食肆先至係本地人杯茶。「西門町」新裝修，門口相當醒神，紅磚牆、鐵門牌、大紅燈籠高高掛，型仔！採訪時值下晝4點幾，附近食肆多數無客落場，但呢度就好似永無落場，依舊人頭湧湧。打尖，霸張靚枱，坐低，我發現到個怪現象，問老闆威哥：「點解全場差唔多清一色係女？」佢話：「呢度女、男客人7:3之比，可能香港女仔比男仔識食啩。」咁答即係向自己面上貼金啫，唔忿，轉頭問隔籬枱兩個女仔，佢哋話：「朋友介紹，呢度夠平夠抵食，食物唔鹹、唔油、好健康，所以附近旺角區嘅OL都好鍾意約埋一齊落嚟開餐。」
向靚女OL搭訕，佢叫我一定要試怪味雞、醉雞同酒煎雞，威哥話：「我廚房班底嚟自台食名店『竹家莊』，由開舖到𠵱家堅持每日訂新鮮雞，咁先有雞味、有咬口，用料靚唔靚無得呃人。」試味，我最鍾意怪味雞，雞肉鮮嫩不在話下，香葱、花椒等配料，細味好鮮甜，靚女仲推介紅油扁食：「我喺『稻香』食過類似菜式，味道都無呢度咁香甜細滑。」威哥話秘訣在於用咗台產「油膏」做調味料：「油膏其實係種類似壺底豉油、質感似蠔油嘅醬料，入口除咗有豉油嘅鹹香，仲多一分麥芽香甜味，其他食肆煮台灣菜，可能就係少咗油膏，搞到無晒風味囉。」
1怪味雞$20（原價$40）
雞肉超嫩滑，花椒、薑、葱、芫荽、醋、蒜茸完全吊出雞嘅鮮味，講明先，香料落得幾重手吓，第一次食小心嗆鼻標眼淚。
2香芒沙拉蝦$12（原價$24）
一碌碌炸蝦超鬆脆，食落有種𠝹口嘅快感，主角係用香芒加沙律醬打成嘅配汁，沙律係最佳口部潤滑劑，減少蝦嘅油膩感。
3涼拌茄子$8（原價$15）
我愛死呢道菜，軟腍茄子保持到紫醬原色，小小辣，加蒜子同油膏吊出鮮味，明明全素，但唔知點解，硬係有種食肉口感。
4美味醉雞$20（原價$40）
即係花雕醉雞，雞剛剛熟，鮮而滑，花雕味相當哽，隊兩件已經有啲醉嘅感覺，例牌4隻雞，廿皮，買料都唔止呢個價。
5醇香酒煎雞$23（原價$45）
熱鍋上枱，天氣開始涼涼哋，啱食！酒氣經熱鍋一蒸，香氣更勝醉雞，而且酒味發散，食落無咁醉，扮矜持嘅女仔都啱食。
6紅油扁食$11（原價$22）
OL大讚辣度適中！純豬肉餃無肥肉，煮得鮮嫩多肉汁。撒面嘅花生、蒜油、辣油極惹味，個個OL都話比得上好多貴價名食店。
7葱釀炸大腸$14（原價$28）
大大條京葱釀入腸心炸，表面香脆一夾似碎又未碎，但腸心如葱一樣嫩口非常，難得碟底滴油不沾，難怪OL大讚唔膩夠健康。
8腐皮蚵卷$14（原價$28）
台灣蚵仔，即係我哋嘅蠔仔卷。蠔仔落重料，食落啖啖到肉，再加芫荽、韭黃、薯仔等素料作平衡，口感唔會太Heavy。
食客有Say
搵食攻略
西門町台灣麵食（23324673）
地址：旺角通菜街2號鴻光大廈2N舖
座位：40個
人均消費：$25-$50
最好賣：怪味雞、美味醉雞、葱釀炸大腸、鹵肉飯
註：憑即日《蘋果日報》即獲半價優惠
優惠期：即日至10月9日2:00pm-5:30pm（星期日及公眾假期除外）