教育學院噚日正式公布今年獲頒發榮譽博士學位嘅名單，分別頒畀美國史丹福大學教育學院CharlesE.Ducommun嘅韓戴蓮達教授，同埋香港協青社總幹事李文烈神父，以表揚佢哋喺教育界嘅貢獻。咦，八方前日明明聽到教院校董會成員話，前特首董建華都榜上有名，點解噚日名單正式公布時，就冇咗老董個名？打探之下，先知原來唔係教院唔重視董先生對教育界嘅貢獻，而係力谷母語教育嘅老董自己唔想攞，婉拒咗人家。
知情人士同八方講，本來係有三、四個人獲頒榮譽博士，當中包括老董，但你肯頒，都要對方願意接受先得，老董𠵱家咁低調，唔想攞，出嚟嘅名單咪得兩個人囉。
唔想俾煲呔扑頭？
本來呢啲榮譽銜頭，多一個都算係錦上添花，老董唔需要咁客氣玩拒絕，但諗真啲，好耐冇出嚟嘅前特首，唔知係咪收到風，知道現任特首煲呔曾今年將會去教院主禮，仲會負責頒授學士、榮譽博士等，所以唔想俾舊下屬扑頭，連榮譽博士都唔攞？抑或係阿董認為受之有愧？
點解八方咁講，話說老董主政年代，亞瑟王李國章曾經積極拉攏中大吞併教院，但教院死命反抗，合併一事先無疾而終；雖然有啲人覺得老董對教育界有啲貢獻，但對教院有乜貢獻，八方就真係百思不得其解。可能係咁，老董諗諗吓都係拒絕為佳。至於話避開煲呔，照計董生冇咁小器嘅，頒大紫荊佢俾人排第三都冇計，畀煲呔威多一次有乜所謂？
有條件者買少見少
至於今次獲教院頒榮譽博士學位嘅李文烈神父，佢多年來一直致力於青少年輔導同外展前線工作，過去40幾年都獻身做邊青工作，佢喺98年仲攞咗特區頒發嘅榮譽勳章，99年攞埋聯合國和平小徑基金會頒發嘅和平工作者獎項，都唔好話小嘢。
香港呢個社會真係奇怪，地方細細，但就有成八大院校，間間每年都要頒授榮譽教授銜頭，你話邊度搵咁多人畀你頒，於是就買少見少，好多人都攞咗幾間大學嘅榮譽博士銜，結果就連大陸同埋海外嘅知名人士、學者都唔放過。