「鍾菜」燈光柔和，為配合裝修，全部員工都清一色着黑色制服。黑色？衰啲講句，有喪事先着喎，好彩個個侍應都着得好鬼有型，連工作咗兩年幾嘅Thomas都話︰「我覺得自己好襯件黑色中山裝㗎。」而做客務嘅Meiji直頭咁話︰「第一眼見套制服已經覺得好Modern，唔老套，着住旗袍自己都覺得斯文咗，都有客讚件衫好好睇㗎。」細睇，袖口、領口同衩位綑綠色邊，黑襯綠好醒神，仲有一粒粒好似玻璃石嘅綠鈕，傳菜珠姐話︰「細緻位做得好靚，成日出出入入廚房，黑色就唔怕污糟喇，以前喺其他地方做過傳菜，啲制服一套過，𠵱家分開兩截，方便好多。」講得好，着得舒服又有型，咁先有心機Serve客人吖嘛。
記者：方綺君 攝影：林栢鈞
1花雕蒸蝦$168
雞蛋托底，海中蝦係主菜，加蟹王、花雕同調味料一次過蒸，蒸熟後再灑少少花雕，入口酒味剛好。
2石榴脆香雞 半隻$148
兩斤半走地雞先浸藥材吊亁，吊燒25分鐘至外皮香脆全熟，伴碟有蘋果同石榴，酸酸哋食多件都唔覺膩。
3金稻牛柳粒$198
飯粒用雞湯蒸好，略炸，口感即時變得卜卜脆。牛柳粒煎香，食到肉質軟滑嘅牛肉和淡淡牛油香。
鍾菜（25069128）
地址︰銅鑼灣時代廣場10樓1001舖