長假期前夕，港股向來偏靜，不過昨日就完全唔同，雖然恒指收市只升12點，好似冇乜變化，但係好淡爭持激烈，各贏半場，上午淡友力壓恒指，攻破10日線再試20日線，下午好友反擊，收復失地。
搏擊之後，好淡雙方會點部署？都係要睇美股，因為港股下個禮拜一假期休市，美股昨晚同下個禮拜一嘅走勢會決定港股下個禮拜二點走。事實上，唔應該話好淡雙方會點部署，因為結算之後，期指未平倉合約竟然仲有成12萬張，部署其實已做咗好耐，𠵱家已經係最後搏擊，邊面贏，個市都會有好大嘅升幅或者跌幅，大家入市要打醒十二分精神，否則好易受池魚之殃。
恒指P輪9761：睇番過去兩個禮拜嘅走勢，捕捉跌市嘅贏面似乎仍然大啲，早排介紹過嘅恒指P輪9761昨日升過上去12.6仙，但係個市晏晝升番上去，隻輪收10.6仙，不過低位嘅買盤都好積極。
放完假返嚟，如果恒指跌穿20日線，個市差唔多無可避免要下試50日線，如果跌穿埋呢條線，到時啱啱轉入價內嘅9761必定會有大作為，如果昨晚同埋下個禮拜一嘅美股整體向淡，咁樣可以買番啲9761，指數下試17350，9761應該唔會低過12.4仙，下試50日線，應該會喺14仙樓上，入貨後以恒指17650做止蝕位，如果假期間美股升得勁，就睇定先入市。
俊樺