為了改善生計，少了兩條腿的郭婆婆，經常坐輪椅到遊人如鯽的鬧市執紙皮，只為多賺幾塊錢多買點有益食物，並將錢儲起以備不時之需。
76歲的郭婆婆年輕時任職小販，每天在街邊擺檔，整天站立引致雙腳痹痛，至54歲時雙腳血管嚴重閉塞，無法走動，醫生指可能會危及生命，最後她無奈同意開刀，切除兩大腿以下部份，自始便靠輪椅走路。
郭婆婆每月領取3,000多元綜援金維生，生活捉襟見肘，殘而不廢的郭婆婆覺得自己仍有力氣多賺一元八塊幫補買餸錢，故每天驅動輪椅到街上拾紙皮變賣。「每次執到十幾蚊，咪攞嚟買吓薑、買吓菜囉！」
由於紙皮有價，區內不少老弱婦孺也欲分一杯羮，郭婆婆坦言因身體殘障常遭排擠，需施展渾身解數與別人「爭飯食」，「其他阿婆嫌我跛，唔同我傾偈，咁我惟有靠部電動輪椅推紙皮，密啲手執囉！」
由於收入微薄，郭婆婆平日十分慳儉，既不斷「開源」，也十分努力「節流」。「我買10蚊豬肉分兩、三日食，其他餸菜都係咁，食唔晒就放入雪櫃，第日再煮番啲隔夜餸食，永遠唔會嘥。」
近日她家中的雪櫃失靈，吃剩食物沒有冷藏，十分不便。「我想買番個雪櫃，如果唔係就唔可以將啲餸分開慢慢食，但係雪櫃咁貴，執多多紙皮都買唔起。」
雪櫃洗衣機均失靈
除了雪櫃，郭婆婆家中洗衣機也失靈，她要用手洗衣物，甚是吃力。另外，她居住舊式公屋單位，露台窗戶仍採用鐵枝架設計，「一打風落雨就好驚，成個露台濕晒，連灶頭都濕埋，幾日都煮唔到飯食。」郭婆婆坐在輪椅，要清理積水十分困難，「有次我拉住窗口塊防水膠片，唔夠力捉住，差啲連人跌埋落街。」她希望安裝鋁窗，以改善生活環境。
蘋果日報慈善基金得知郭婆婆的困境，正安排為她安裝鋁窗，代為支付所需費用。至於洗衣機及雪櫃，則盼善心讀者施予援手。
捐款編號：C2178