港股9月最後一個交易日，仍維持9月反覆波動的特色。恒指昨日高開後大插水，最多跌過180點，淡友以為鴻鵠將至，誰知好友黃雀在後，淡友午市又被挾到眼光光，恒指最後倒升12點，收17543，若由低位計，反彈幅度達192點，淡友都咪話唔傷。
大戶近排頻頻對撼，但始終好友佔盡上風，好友肯在港股長假前挾高收市，除了有季結粉飾櫥窗的效應外，似乎亦啓示大市短期唔會散住，畢竟工行即將進行路演招股，港股若大散，會損害好多人利益。
下周走勢唔易估
但另一方面，恒指昨日雖扭跌為升，但全周仍跌58點，周線圖高位出現十字星，令下周走勢存有隱憂。
事實上，美股道指近日挑戰11750歷史高位，假如受阻將引發獲利回吐，港股很難不受拖累。如果道指調整跌穿20日線（現處11214），將有機下試10800水平，因此10月雖未必有股災，但出現調整的機會亦不小，投資取向宜轉為審慎。
大市昨日拗腰成功，如果美股無礙，估計假期後，港股復市再挾高的機會相當高，倉內的股票到時才伺機趁高減持。至於下周較詳細部署，在看完美股周五及下周一走勢後才作分析。
趙飛雲