朱玲玲同霍震霆最近再度傳出離婚消息，日前有報道話係佢透過老友葉蒨文（沙麗）承認的確喺兩年前離婚，消息傳出後，近排朱玲玲極力迴避記者追訪，但為咗佢深愛嘅羽毛球運動，噚日終於出山，同沙麗一齊去到馬來西亞為「第13屆全球華人羽毛球錦標賽」擔任嘉賓，仲落場作賽。
沙麗臨陣受傷
狀態大勇嘅朱玲玲今次係第一次去當地嘅羽毛球館比賽，將會同男拍檔參加混合雙打，至於沙麗雖然備戰多時，準備參加女雙項目，但出賽前兩日練習嗰陣唔小心拉傷右腿肌肉，醫生要佢休養六個禮拜先可以再做劇烈運動，咁梗係冇得出賽啦。其實佢上年本來要參加喺上海舉行嘅羽毛球比賽，結果都係因為受傷而無法上陣，難怪佢話受傷退出係世界上最痛苦嘅事。
雖然唔開心，但面對其他球員熱情要求影相，沙麗都來者不拒，佢話今次出師未捷身先死，下年個比賽會喺廣州搞，佢話一定要好好保護身體，到時喺球場上一展英姿喎。
