侍仔：歐協盃呢啲波真係唔識點樣估，估親都唔中嘅，星期四嗰晚買咗5場，結果無1場中。
菠蘿文：你連嗰啲球隊係乜都未知就學人賭。
招積域：我前晚先係投注站聽到有人話：「我唔知對手係咩嘢，總之AZ搭帕爾馬單W2串1！」最後結局咪係輸錢囉。
菠蘿文：侍仔，歐協盃去到分組賽先賭啦，起碼你知道邊隊打邊隊，唔使下注喺嗰啲咩嘢列廸斯洛維治度。
侍仔：言歸正傳，今晚啲波有咩嘢心水呀？
菠蘿文：曼城、聖美倫、錫菲聯單W，3串1；再整個查爾頓同車仔嘅細波膽2串3。
招積域：聖美倫你仲追？佢哋似乎腳軟軟咁喎！你又唔係錫菲聯球迷，做咩事落注佢身上，輸多。
菠蘿文：咁鍾意博冷門，畀隊史雲斯你啦！佢哋家陣個勢唔錯㗎，今晚作客對榜首隊森林，贏埋佢都可以。
艾度令人期待
侍仔：網上新聞話雷丁想借用美國嗰個神童艾度喎，乜咁細個可以出國踢波咩？
菠蘿文：巴西就唔畀18歲以下𡃁仔出國踢波啫，但美國就好似無喎，仲話出年1月或者去到雷丁落班。
招積域：呢個黑仔踢前鋒同左中場都可以喎，個人覺得佢好波過朗尼同禾確特。
侍仔：佢又唔可以同朗尼比，身形差太遠。
菠蘿文：雷丁有呢個咁好嘅消息刺激，聽晚作客韋斯咸又係無難度，surewin啦！
高洛文