特首選舉前哨戰好快揭幕，公民黨下周二就有人名出台，如無意外，傑哥會上陣同煲呔一較高下，所以曾特首都不敢怠慢，全力埋班。
最頭疼當然係CS人選要等阿爺發落。八方曾經聽過班AO講，佢哋最服肥龍，因為佢日理萬機都處變不驚，認真壓得住場，叫邊個頂佢個位都一定冇法子比較。可惜許太唔放人，退而求其次，有部份AO屬意唐唐，話佢個人雖然有時口直心快爆錯料，但係佢對公務員都好客氣，所以唔排斥佢，唐唐做慣太子爺唔使點做，一定識同高官打交道，等佢哋做晒啲嘢。
至於李國章，就好多AO覺得太霸道，而鬍鬚仔就話未夠班喎。其實講嚟講去，都係對公務員出身嘅就講論資排輩，外人就對佢哋好就得，咁仲有一個人選可揀，就係孫公孫明揚。
孫公同煲呔資歷差唔幾，雖然風頭不及其他人，但係單單棘手嘢佢都最後拆掂，呢種問責高官唔易搵，你話老，佢同煲呔咁上下之嘛。煲呔能，佢點解不能？大家都係華仁仔，好過俾皇仁仔威晒。