上海集優（2345）今年4月以2.10元招股上市，4日內升至最高3.30元，但不足一個月內跌至最低2.375元，反彈受制3元，噚日收報2.52元，升8仙。隻股雖然近月跑輸大市，但仍有散戶叫大家「趁這兩星期立立亂買入上海集優」。
喺「公眾投資168綜合論壇」內，網友空空和尚話：「基本因素不差，看中長線！如跌穿2.4蚊是（入市）良機……試看看一年後回報如何！」
集優係上海電氣總公司旗下嘅精密零件、部件及配件製造平台，主要客戶都係國內外著名企業同政府機構，包括通用電氣、東芝、日立、國家鐵路局同中國太空總署等，啱啱接獲國內同海外巨額定單，未來4年盈利已有保障。集團過去兩年盈利複式增長率逾100%，今年上半年盈利亦大漲1.2倍，屬高增長股。
隻股近排可謂屋漏逢夜雨，繼母公司有高層違規被查後，復有策略性投資者澳洲聯邦銀行密密減持，上星期又被陳良宇單case拖累。其實上述事件同公司本身管治無關，只係不幸被拖落水，相信事件淡化後，股價可以重新反映本身嘅價值。
股價走勢已見回穩，短期上望2.90元，跌穿2.40元止蝕。
余文