國泰慶祝六十年，在沙田馬場搞歡樂派對，千幾人到場，場面認真墟冚，國泰公關部的確做得出色，當然國泰董事會肯大手筆，搞公關活動如果錢不是問題，咁就易辦事，國泰嘅公關一哥程鼎一點會唔識做吖。
一到馬主觀馬台，碰見前議員Ｔ，現議員Ｃ兩位摸住酒杯底打牙骹，有乜好拗呢？行埋去聽吓，原來佢兩兄弟你指住我，我指住你話：「你唔好爭我啲捐款呀。」問清楚，議員Ｃ為母校男校籌款，前議員Ｔ為太太母校女校籌款，因為大家嘅朋友、同學都係嗰班人，譬如議員Ｃ打醫生Ａ心口，前議員Ｔ亦會叫醫生Ａ捐款，咁就扯薄晒啦。前議員Ｔ話：「其實議員Ｃ太太與我太太同是女校校友，議員Ｃ你應該畀面太太啦，籌款唔好去得咁盡，留番啲畀我！」
問議員Ｃ籌款目標係幾多，佢話：「四五億啦！」左丁山嚇咗一跳，科技大學今年好似仲未籌到咁多，浸大城大都冇咁大野心噃。議員Ｃ話：「籌得到嘅，目前已籌一億五，搵四、五億，問題不大，𠵱家辦直資中學，冇番咁上下錢打底，好容易輸蝕畀啲國際學校㗎！」男校籌得咁多錢，女校又如何？前議員Ｔ好謙咁說：「慢慢嚟啦，我哋會達標嘅！」
諗落男校學生畢業三十年，好多人發咗，捐錢回饋母校比較爽手。女校畢業生多數嫁咗人，捐錢要問吓老公，就係蝕底在呢樣，有啲戥啲女生唔抵，因為女校嘅會考高考成績明顯係威過男校好多！不過現實如此，徐詠璇搏命幫前議員Ｔ為母校籌款都唔會過到男校頭。
名校爭相變成直資，兼大量籌款，可以將既定優勢擴大，吸引到最優質學生，睇落香港將來都會有所謂IvyLeague（長春藤）中學，收生不愁，其他學校就會飽受生育率下降嘅影響，只好奮力求存，希望逃過殺校一劫。