謝霆鋒與張栢芝日前於菲律賓附近的小島秘密註冊結婚，轟動整個娛樂圈，除圈中人議論紛紛外，有網友更於網上討論區開設「霆鋒栢芝菲律賓奉子成婚？」等專題發表意見。
陳小春：愛人結婚了，新郎不是我？𠵱家2006年啦！人哋結婚係喜事，我做乜要酸？咁咪好囉！𠵱家謝生認咗，咁我就打畀謝太恭喜佢。不過結咗就唔好搞咁多嘢，結咗就認真，一係唔好結，結咗唔好信口開河，結咗婚就係一世。
何超儀：都有少少嬲霆鋒結婚都唔出聲，佢哋返嚟一定要補請食飯，都未諗到送乜嘢畀佢哋。
何韻詩：作為朋友都戥佢哋高興，呢啲嘢不分年齡，只要成年同兩情相悅就得。如果真係有BB，希望佢哋生女，如果生仔我怕霆鋒教個細路擺甫士。但我唔明點解佢哋去菲律賓結婚咁得意，如果係我，就去婆羅乃。
許志安：係就要恭喜佢哋，如果真係有埋BB，就要送份大禮畀佢哋，霆鋒大個仔喇，我自己都要加把勁努力先得。
鍾欣桐：可能佢想我哋慳番啲（指人情）呢？
容祖兒：作為朋友會祝福佢哋，係事實嘅話咪恭喜佢哋囉，我唔會打去問咁八。
吳國敬：恭喜晒呀，佢兩個成日畀驚喜人，如果真係有BB就更加恭喜，我會送奶樽同中式孭帶畀栢芝，等佢試吓孭仔，霆鋒都係時候定性。
Micky2006（網友）：經歷咗咁多都終於喺番埋一齊，真係恭喜晒啦！衷心祝福佢哋啦！
croissant（網友）：佢哋生BB，就即係造就多一個可悲嘅小朋友，佢哋兩個睇個樣都知未定性，阿栢芝仲癲得得咁……一時就散，一陣又話一齊，結咗婚都可能係咁囉，如果佢哋有BB，個BB即係生長喺「問題家庭」度囉。
網友資料來源：www.discuss.com.hk