嶺大陳坤耀噚日以大學校長會召集人身份，出席為期三年嘅馬會學生暑期實習計劃閉幕禮，席間同八方提及陳四萬參選特首「行人止步」一事。佢話作為陳太好友，好尊重對方嘅決定，又認為陳太未來幾年扮演提供政策角色亦係唔錯決定，話唔定將來可能成為政府嘅非正式影子內閣，監察政府。
佢仲強調陳太嘅核心小組唔易做，因為少啲人力、智力及財力都唔得。至於點解陳太核心小組唔預佢一份，佢就笑稱不願置評。陳校長又話，其實香港𠵱家最急切解決嘅係憲制改革問題，因為呢樣嘢喺《基本法》入面一片空白，有好大發展空間，可以由呢度循序漸進，慢慢發展到全面普選，以及有政黨嘅部長制，而唔係吓吓要做游說工作。
佢最後直指香港目前嘅立法同行政脫晒節，高呼強政勵治或良政勵治係冇用嘅，要制度配合，越快諗呢個問題就越好，故此特首係咪普選或雙普選，係次要問題咁話。