女記者小G睇到段新聞，講內地婦人來港產子，瓜熟蒂落，趕唔切入威爾斯醫院，就在大學站緊急停車、落車，在月台上由車站唯一一位女職員接生，上午八時二十分順利產下男嬰。香港人之質素確係高，肯熱心幫忙，女職員臨急不亂，值得大讚特讚。比較另一段新聞，話重慶的士司機拒載趕往醫院生仔之孕婦上車，香港人值得驕傲。
小G因而想起佢嘅女同學不久前要入院待產，點知間間私家醫院產科全院滿座，唯有去公立醫生，公立醫院之內滿是「自由行」來港產子產女嘅內地女士，看護做到頭暈眼花，小G嘅女同學瞓在床上，渾身不舒服，並非因為佢想唔同內地婦人同處大房，而係內地婦人動作多多，一啲居然猛咁跳，一位叉開大腿踎在地上，護士不停喝止。內地婦人話：「我哋鄉下係咁㗎，踎得多，胎兒出來嘅時候我會冇咁痛。」護士為之啼笑皆非，幾乎喝到冇晒氣。小G女同學話下次再生嘅話，點都要爭取入私家醫院。
私家醫院咁好生意，公家醫院產科忙到不可開交，皆因內地人來港入院之故。唔怪得呢兩年嘅本港嬰兒出生數字，竟然止跌回升，由以前嘅四萬八千名（約數）增加到五萬幾名。照睇數字，唔深入了解嘅話，仲以為香港生育率上升，將來幼稚園、小學新生人數可望增加，避免殺校㖭。扣除番內地人在港生產（約一萬三千）數字後，其實本港生育率仍然在谷底徘徊。問題係呢班在港出生嬰兒有居港權，佢地將來會唔會在本港入學呢，教統局做規劃，相信好難預測。
小G好奇問吓，喺大學站出世之男孩，會唔會好命呢，抑係在咁嘅困難環境出世，係苦命格局？於是問八卦邱，佢立即查萬年曆，找出呢位大學站出世嬰兒嘅八字：二○○六年九月二十四日上午八時二十分，即丙戌年丁酉月丙辰日壬辰時，佢屈指一算，嘩，好命噃，農曆八月丙火日出生，用神壬水。命書云「四柱多丙，一壬高透為奇，定主登科及第，富貴雙全」，不得了！八卦邱話：「如果佢媽咪捱到入威院先至生，出生時間應該係早上九點幾十點，即癸巳時，格局就差好多咯！」姑妄聽之。