老實，agnesb.令你諗起乜？法國？Shopping？以後你會諗起法國餐，因為agnesb.全球首間餐廳兩日後喺香港開業。餐廳雖小，但傳統法國菜式由沙律、薄餅、三文治到肉類海鮮應有盡有，保證大家食到經典法國菜咁話。法國我未去過，菜式有幾經典唔敢批評，不過喺如此浪漫雅致環境，買束玫瑰送畀女友共晉晚餐，女友一定冧囉。
記者：黃若茵
攝影：伍慶泉
模特兒：Joey&Pakho
堅持做傳統法國菜
agnesb.開全球首間餐廳「lepaingrille」，食材全部由法國空運到港，就連一隻雞，法國人餐飲經理Christophe都堅持要由法國入口：「因為喺法國嘅飼養方法唔同，飼料又唔同，所以不論肉質定雞隻大小都有分別，內地或者本地供應嘅雞隻我唔會用。」喺香港試過唔少法國菜嘅佢話：「喺香港，的確有唔少好食嘅法國餐廳，但佢哋淨係識得賣貴嘢，反而忽略咗傳統嘅一面，就好似雞蛋奄列呢個簡單嘅菜式，係好傳統嘅法國菜，但香港嘅法國餐廳就好少有。」
Christophe示範19世紀法國人飲苦艾酒方法，先倒少少苦艾酒入杯，上面放一隻大匙羮，匙羮上放一粒糖，開水喉，冰水慢慢滴到糖上，再融化到帶苦澀味嘅苦艾酒中。
處處突顯法國味
除咗食物，餐廳就連每張櫈、每格地磚、每件飲苦艾酒嘅器皿、吧枱嘅鍍錫鐵皮，都由法國千里迢迢送到，不過你唔會覺得呢度過份簇新，反而有種古老懷舊感。Chrisophe話：「呢度每張櫈都係舊㗎，係我喺法國一啲二手傢俬店搵番嚟。」唔止枱櫈裝修，連枱上嘅擺設都做得好仔細，「中午會擺小插花，配合埋陽光照射，感覺好Fresh；到咗夜晚就擺蠟燭，加埋柔和燈光，好浪漫。」想再浪漫啲，你仲可以到餐廳樓上嘅agnesb.花店，買束靚花畀女友，女友一定冧。
烤鴨胸$165
鴨胸由法國入口，面層烤得十分香口，點傳統法國人食鴨胸必加嘅醬料Fourspice先至最正宗，因醬料能完全帶起鴨胸肉嘅鮮甜味。
雜椒羊奶芝士$68
烤過嘅紅椒、黃椒同青椒包住羊奶芝士，芝士處於溶化狀態，味道溫和，入口自動滑入喉嚨，食多兩件都唔覺膩。
白酒煮青口$178
一份有500克青口份量唔少，除白酒外仲加入洋葱同忌廉，入口好Creamy。另有少一半份量嘅前菜供選擇，唔怕太大份食唔晒。
尼斯沙律$58
負責人話：「法國咁多種沙律之中，要數尼斯沙律最傳統。」餡料有吞拿魚、綠豆、橄欖、蛋同法國鹹魚仔等，感覺清新。
鮮魚湯$60
鱸魚、三文魚、鱈魚等鮮魚加洋葱同香料熬成，上碟另配芝士、蒜茸茄醬及麵包，麵包點湯食好滋味。
食客有Say
Cody（左）：「魚香同腥味只係一線之差，呢度嘅魚湯好香。」Angela：「魚湯好香濃，但又唔會濃到好難入口。」
Lulu（左）：「食物上得比較慢，但就好有水準，好Fresh。」Anfernee：「叫咗杯凍朱古力，唔太甜，好啱我口味。」
搵食攻略
lepaingrille（25772718）
地址：銅鑼灣禮頓道111號地下
營業時間：周日至周四12:00nn-11:30pm，周五及周六12:00nn-12:30am
交通：銅鑼灣地鐵站F出口
座位：46個
有着數：即日起至2006年11月30日，致電28942746預約晚餐，並惠顧滿$500即可獲贈angesb.水杯4隻，或惠顧滿$1,000可獲贈angesb.紅酒1支連酒杯兩隻。