薛芷倫前晚在北京出席手錶活動時表示現在十分享受單身生活，暫不想拍拖，而且計劃寫作。她又表示有留意傅明憲夜蒲攬仔的報道，理解對方可能為了解憂才放縱自己，因為自己有過這種失意的經驗。 北京直擊
穿上Gucci秋冬新裝的薛芷倫（Fanny）前晚現身北京君悅酒店，專誠支持好友趙金卿為瑞士名錶RichardMille任公關的活動。
問到與清洪契仔巫雨平來往甚密，薛芷倫笑說：「我哋真係朋友，大家緣份未到另一階段，雖然我身邊有好多男性朋友，不過自己唔想拍拖，啱啱先喺婚姻枷鎖走出嚟，以前啲時間畀晒家庭，𠵱家自由自在啲。」
問到有否見過前夫馬清偉的女友Winnie，Fanny說：「見過，幾靚。」她又透露剛與前夫陪同16歲的大女到美國開學，她說：「同馬生留咗一個weekend，大家同個女講拜拜時都喊到豬頭咁。」
問經常夜蒲的Fanny有否留意已婚的傅明憲與丁子高、周立璟親暱夜蒲的報道，她說：「可能佢去玩飲大兩杯。」問她會否覺得與傅明憲的婚姻生活有關，她說：「可能都係，呢個時候去蒲都係解吓憂，好似我自己當年都係咁，嗰段時間有時放縱吓，不過自己飲酒都會保護自己，身體接觸更加警惕。」
葉梁美蘭劃清界線
另一邊廂的葉梁美蘭前晚到君悅酒店出席社交雜誌《HongKongTatler》活動，她以往與傅明憲好像Ball場孖公仔，問到早前傅明憲夫婿葉劍波創辦的海域系上市集團疑遭人挪用數億公款，結果爆煲清盤，葉劍波即消失得無影無蹤，她前晚表示已經很少與傅明憲聯絡，還說：「我都有去日本睇麥當娜演唱會，不過去到當地冇同GiGi（傅明憲）聯絡。」
傅明憲日本之行被拍到連環𠝹仔，好姊妹葉梁美蘭說：「我都係睇雜誌（先知），見到好shocked（震驚），都唔似佢本人，我諗一定有佢嘅原因。識佢咁耐，以前都唔會咁做，佢應該好大壓力，希望佢開心，同埋我覺得佢先生要出嚟交代。」
對於有報道指傅明憲自從夫婿失蹤後依然富貴，又買車又買名牌手袋，還贊助百萬元予愛護動物協會翻新位於西貢的會址，問葉梁美蘭是否覺得好友依然揮霍？她說：「佢咁鍾意時裝，咁靚女咁青春，都OK，呢啲係佢嘅事，唔關我事，總之我近來同佢好少聯絡。」
採訪：DebbieLum（北京）、GeneNg
攝影：ChanShunJing（北京）、MatthewLam
