教育學院11月28日畢業禮，新舊特首又再碰頭，皆因煲呔親臨主禮，頒授榮譽博士學位畀老董，表揚佢多年來對教育嘅貢獻。講開教院，近排佢哋有幾個高層職位懸空，校長又未知去留，噚日就宣布搵到一名新任副校長，接替即將退休嘅倪偉耀，候任副校長就係現時理大協理副校長暨財務總監蒙燦，下年1月到任行政副校長。另一名副校長陸鴻基嘅空缺，教院正請緊人。
另外，嶺南大學噚日就宣布頒個榮譽院士銜頭畀許冠文，當然佢唔係靠講吓笑就做到榮譽院士啦，嶺大話許冠文電影獲獎無數，又開創香港「棟篤笑」，而且佢好熱心教育，今年仲擔任嶺大中文系榮譽講師，喺「傳媒寫作」同「中文傳媒寫作坊」兩個課程任教創作笑話嘅技巧，訓練學生嘅口才同思考能力。
其他三位同許冠文一齊獲得榮譽院士銜嘅都係社會俊傑，包括震雄集團董事蔣麗莉、婦女事務委員會主席高靜芝，同埋職業安全健康局主席伍達倫。