香港人好食好住，肯定想像唔到住喺帳篷、不時冇嘢落肚嘅難民生活有幾苦。無國界醫生噚日喺九龍公園搞咗個難民營實況展開幕禮，請咗行會成員梁智鴻、衞福局常秘尤曾家麗、民主黨單仲偕、民建聯葉國謙同公民黨張超雄，齊齊入仿製帳幕，體驗吓難民生活。
班嘉賓見到難民煮食用具同玩具都好感興趣，忍唔住拎起玩咗一陣，而且又齊齊試食無國界醫生用嚟治療營養不良小朋友嘅高營養餅亁。單雞食完就話「可以食，但唔可以話好食」；阿謙食完就面露難色。
佢哋後尾又試吓學難民咁喺水站度裝水，仲嘗試用力攞起一桶20公升嘅水，體驗難民每天去水站輪水嘅苦況。唔知單雞平時係咪有做開Gym，佢竟然一次過攞起兩桶，難怪張超雄笑佢有資格做難民。市民如果想體驗吓，可以10月4號前去九龍公園。