呢排特攻隊手風轉沉，今次周末大場面，點都要搵自己最有信心嘅聯賽振吓聲威，熱門捧英冠3哥修咸頓，冷門吼狼隊在1哥卡廸夫城地頭揚威。文：蘋果波神
今屆英冠打咗唔夠五分一，不過形勢已經開始露端倪，我上月尾曾經預測伯明翰、修咸頓同西布朗季初會跑出，一個月後，3強中除西布朗稍失望，而其餘兩強合乎期望，暫時估呢3強升班嘅信念不變，而今次我要推介嘅就係近況甚為勇銳嘅「3哥」修咸頓嘞！呢支喺南部僅次於老樸嘅大會，星期六唔單止有主場之利，對手仲係人腳又老又殘兼近況麻麻嘅昆士柏流浪，修咸頓單W實食冇黐牙，啱心水仲可以敲埋修咸頓「主勝」㖭！
昆士柏兵殘兼冇態
修咸頓上屆無法降班後立即回升英超，今屆要重返頂級聯賽之心更加明顯，領隊佐治貝利喺今夏簽入咗龍門奇雲戴維斯、後衞馬堅、中場史卡素、維亞法拉、伊廸亞基斯，同埋前鋒巴利胡禮菲臘斯等猛將。以咁嘅人腳，經過季初一輪磨合後，最近終顯威力，連贏3場聯賽升上聯賽第3位，氣勢正盛，其中前鋒拉斯亞克更入球停不了，近3場聯賽入咗4球，試問昆士柏流浪嘅後防點頂？
至於昆士柏流浪係就係英格蘭老牌球會，至弊係佢哋球隊現時嘅主力就一樣咁老，好似門將保羅鍾斯、後衞米蘭尼斯、中場盧馬斯同埋前鋒加倫咁！一唔係就係牛奶仔，好似今場會倒戈嘅布力史托同埋前鋒雷鍾斯等等，連曾效力傑志嘅中場翟冠達都羅致，唔怪得目前只以2勝3和4負排第19，原領隊禾鐸亦剛掛冠而去，換上前維拉領隊基哥利。
雖然基哥利都算有啲名氣，上場首次領軍仲即刻贏咗侯城2:0，不過嗰場似反底居多，基哥利面對流浪呢個爛攤子，真係有排執㗎！相信喺星期六時都幾難再下一城，喺修咸頓身上搶到分。修咸頓呢個1.55倍W，應該冇走雞。
冷選方面，亦都係星期六嘅英冠場次，就係冷敲狼隊作客可以喺榜首嘅卡廸夫城身上成功搶分。卡廸夫城今屆表現確係好似好勁咁，6勝2和1負以20分居榜首；不過，睇返佢哋嘅人腳，主力好似前鋒祖柏、中場麥法尼同後衞佩斯等，效力英超球隊時都不過係掹車邊球員，實在唔覺得佢哋有霸氣，雖現居榜首，但個人仍甚有保留。
敲狼隊𡁻低卡廸夫城
有一點值得留意嘅係，狼隊近屆同卡廸夫城交手，往績一啲都唔失禮，取得2勝3和1負，加上狼隊有前鋒保夫萊特壓陣，今屆聯賽已分別以1:0小勝主場特佳嘅般尼同列斯聯，今場「讓球主客和」受讓一球實在筍，更可小注大冷W！
投資特攻隊金句
英冠聯強弱分明唔難搵，經過個多月激戰後，形勢更為明顯，要搵長期主攻嘅聯賽，誠屬心水之選。