【本報訊】夜闌人靜之際，就是的士司機提高警覺之時，的士殺手凌晨在深水埗鬧市冷血劫殺58歲的士司機，令不少司機人人自危。有的士業人士建議司機應重新裝上防盜膠板。警方防止罪案科則提醒司機：「無嘢比自己條命更重要」，一旦遇劫不宜反抗，但需緊記匪徒特徵，以便警方破案。
兩年前曾遭賊人刀架頸搶劫的司機阿Lam，當日的經過至今仍歷歷在目，他昨晚向記者說，當時，兩賊人在港島截乘其的士去觀塘，抵達後其中一人以刀架着其頸部表示打劫，他不敢反抗，因害怕命喪刀下，只有向賊人「求情」說：「大佬，搵食啫，要錢攞晒去，唔好傷害我。」最後他只是破財擋災，並沒受傷。
應加裝防盜膠板
另一名於去年3月在將軍澳力抗5賊而受傷的的士司機歐陽先生，至今仍心有餘悸。他說，昨日有行家抗賊喪命後，家人立即致電給他，叮囑他遇劫時千萬不要反抗，「梗係啦，畀把刀架住條頸，點反抗吖，佢（賊人）要錢咪畀佢囉，但希望唔會遇到嘞。」
其實，生死往往總在一念之間，01年一名六度遇劫的57歲司機，被匪徒行劫兼毒打時，即冷靜地閉氣「詐死」而逃出鬼門關。
警方數字顯示，今年至8月止共發生26宗的士劫案，而去年全年為31宗，雖比95年全年的300多宗高峯期大為減少，但冷血程度不減。的士權益協會主席劉劍魂坦言，約十年前的士劫案非常猖獗，當時不少司機為安全計，都會在車上加裝防盜膠板，但近年案件驟減，司機貪求方便，已將板拆走，「其實裝番塊板會安全啲，三幾百蚊唔多呀，啲賊取易不取難。」
警方防止罪案科行動組高級督察葉靜嫻從案中死者身中多刀來看，估計他曾反抗。她說：「生命可貴，錢無咗可以搵過，千祈唔好反抗，啲賊都係求財，無嘢比自己條命重要。」葉提醒夜更司機，應與電台及同行預先設定求助暗語，一旦出事，他們可代司機報警。
