陳小春的歌曲名稱向來抵死，由《犯賤》到現在的《劫數難逃》甚至《鬥苦》，原來都未算，他還打算在推出最後一張唱片時唱粗口歌，因為他覺得唱完粗口歌後再唱情歌已無公信力。談到感情，小春謂曾遇過結婚對象，可惜有緣無份，但他就堅決否認曾與剛傳出婚訊的栢芝相戀。
陳小春最近推出新廣東碟《鬥》，主題及選曲大部份都出自他的構思。他表示「鬥」並非指他的心態，而是他看不過眼的事：「娛樂圈鍾意鬥，點解唔可以團結？我係見得多有感而發，香港人唔好咁啦，香港人愈嚟愈無情。」
炒車最不開心
滿腹牢騷卻不代表悲觀，小春自言很知足，他說：「我唔覺得自己悲，我好滿足，由個屋邨仔搞到咁，仲想點？我呢排唔開心嘅事算係炒車，但我真係算個幸運人，咁都冇事，當然我做人問心無愧，食得瞓得乜都得。」
天生性格火爆，但小春的火未有隨着年齡遞增而減退，更自言愛唱粗口歌，他說：「唱歌可以講好多嘢，出最後一張唱片時，我會唱粗口歌，因為一唱就唔可以返轉頭，你唱完粗口歌，再唱情歌，邊個信你？香港演員講粗口就係低水準，用粗口放喺音樂上，係一個好大嘅課題。」陳冠希也曾唱粗口歌，難道他再唱情歌已無說服力？小春說：「英文粗口咪唔mind囉，中文粗口咪冇水準囉！我唱完嘅話，啲人再話鍾意陳小春，就可能會俾人話冇文化，𠵱家我仲希望繼續唱歌㗎。」
歎與婉婉無緣
小春多年來最為人知的戀情，大概就是和車婉婉及張栢芝了。雖然小春大讚婉婉是好女仔，奈何兩人有緣無份，但他卻堅決否認曾和剛傳出婚訊的栢芝拍過拖，他說：「我冇同佢拍過拖！推油係人哋講咋，搽太陽油有乜問題？friend冇問題㗎，嗰日公司同事都喺度，總之有乜嘢你哋問番佢啦。」
仍是單身寡仔的小春坦言很想組織家庭，早前他曾公開表白有心儀對象，問到進展如何？小春說：「都要人哋認同先得㗎，唔係食檸檬，我嘅私生活唔想分享！」其實小春至今仍難忘舊女友，對方是圈內人，但不同國籍，小春說：「其實四、五年前我都有遇過結婚對象，嗰次miss咗，𠵱家諗番都覺可惜。唔係性格唔夾，只係有時我做嘢太攰，冇時間見面，原來咁係唔得㗎。」採訪：蔡如玉 攝影：陳志嵐
場地提供：諾士佛階夜蒲東
