早兩個月先話梁洛施（Isabella）有六、七個廣告喺手，又話導演劉國昌執導嘅06年版本《靚妹仔》都會由佢擔正，言猶在耳，馮仁昭噚日就收到英皇決定雪藏Isabella嘅消息。
兩年換5助手
聽講今次之所以要雪藏Isabella，同佢嘅工作兼做人態度有關，其實Isabella13歲簽英皇，16歲正式入行發展，到𠵱家只不過係短短兩年幾，但喺呢段時間裏面佢竟然前前後後換咗五個助手。消息話Isabella當助手阿四咁，所以個個都頂唔順，決定唔撈。
除咗對助手衰之外，Isabella對其他同事嘅態度都好差，成日以為自己好紅，講嘢寸爆，搞到冇人肯湊佢。英皇衡量過之後，決定採取行動，暫定雪藏一年，如果到時Isabella肯改過，咁都會重新畀機會佢。𠵱家英皇已經停咗佢大部份嘅工作，所有可以推嘅工作全部推晒。
Isabella同英皇𠵱家仲有成10年先約滿，如果真係雪佢，咁佢真係乜嘢前途都冇晒。馮仁昭聽講Isabella份人好硬頸，如果佢唔想做嘅嘢，係冇人可以迫到佢，呢種唔聽話嘅性格同公司唔係好夾，睇嚟佢都係時候認真諗吓前途問題咯。