相信大家仲記得《大長今》，喺上年，「大長今」三個字差唔多係韓國嘅代名詞。Wendy係韓國居食屋「南山谷」知客，着起一身靚靚韓服，到今時今日都仲有人叫佢做大長今：「套衫成日俾人讚㗎，有次去廁所，要排隊，有個女仔話我係大長今，仲話套衫好啱身好襯我；又試過有個着住韓服嘅小妹妹，要求同我影相。有次仲誇張，有人以為我係韓國人，唔敢用中文同我講嘢，要我話番畀佢聽我係香港人呀。」
「南山谷」有5套唔同韓服畀Wendy替換：「除咗呢套，我仲有綠、藍、粉紅總共5套唔同顏色嘅衫，有啲係老闆搵人訂做，有啲就現成買。」呢套制服上衣用亮色，下衣用暗色，上衣有花紋，加埋衣帶、闊長裙等，好搶眼，但傳統韓服嘅闊裙內會加篷裙撐起，令裙睇上去好似一個大燈罩咁，Wendy呢套就無加篷裙，所以着起嚟好方便，佢話唯一缺點係：「行路要小心，否則好易踩到自己條裙仆倒，好在我一直都無發生意外，有時我覺得套衫靚得滯，成日俾人望好唔好意思呀。」
記者：蘇振鵬
攝影：陳陶鈞
辣豚肉泡菜石頭飯$65
豚肉用自製辣醬醃過，味道帶甜，微辣，飯用泡菜炒香，放在石頭鍋內，令飯粒亁身香口，係道非常受歡迎嘅菜式。
餃子年糕鍋$55
韓國傳統家常菜，餃子包泡菜豬肉餡，味道較濃，好彩配番淡淡清湯、煙韌有嚼勁嘅年糕，加埋口感恰到好處。
醬烤五花肉$48
五花肉脂肪均勻，用水梨、蘋果、奇異果等生果醃過夜，肉身變腍帶甜。用鐵板燒，逼出多餘脂肪，五花肉更爽口。
南山谷（26082172）
地址：沙田新城巿廣場第1期5樓507號舖