周六4場賽事波膽有路捉，串埋過關有世界，唔使犯本，5注出擊，貫徹刀仔鋸大樹精神。
漢堡近況雖然差勁，但呢支啱啱喺歐冠盃輸波輸盤嘅德甲球隊，無可否認有其質素；今周作客到訪法蘭克福，對手贏近況，但始終都只係上季聯賽榜下游分子，漢堡呢場不無「反底」機會，博呢支今季長期開「細」球隊贏1:0可也。
羅連安特和特魯瓦
愛華頓開季至今，仍然保持到穩定成績，今輪返主場，迎戰戰績不穩、尤其客場唔可靠嘅曼城，前者勝算高。料波膽不離愛華頓淨勝1:0或2:0，因為經常保持唔失波，係「拖肥糖」由上季中至今延續佳績嘅成功原因之一。
羅連安特主場對特魯瓦，屬於法甲聯「海軍鬥水兵」，呢啲對碰開和波易過食生菜；睇番羅連安特今季主場有啲入球本事，特魯瓦上周作客波爾多亦有波入，各一言和冇甩拖。
波爾多雖然今季已經輸過3場波，但對手都係里昂及馬賽等勁旅，面對實力較次分子，仍然能夠保持上季勇奪聯賽亞軍本色；上周對特魯瓦，雖然一度落後於對手，但最後都能夠反勝，更令筆者對呢班波殺弱旅有信心。今周佢哋作客升班馬華倫西恩斯，可向波膽波爾多贏2:0埋手。 文：華度