暫列意甲榜首嘅國際米蘭，喺周三歐冠盃主場以0:2輸畀拜仁慕尼黑，教練文仙尼完全駕馭唔到自己班星級球員，伊巴謙莫域同格羅素先後拎紅牌出場，我求大俠睇嚟文仙尼都「係咁先」喇！
粒粒皆星難以駕馭
國米唔單止輸波，仲成為拜仁近18年嚟首支擊敗嘅意大利球會！國米分組賽兩連敗，教練文仙尼好似唔多忿氣，佢話：「我哋一直控制比賽，直至伊巴謙莫域被趕出場，而且第一個失球係可以避免嘅。」球隊係咪算控制到場波就見仁見智，但係佢控制唔到班「大帝」就眾人皆見。
韋拉轉投咗國米後，開季無耐已喺歐冠同聯賽拎咗兩張紅牌，搞到呢場要停賽；周三晚，伊巴謙莫域又踢到發𤷪，格羅素仲衰打踭，結果當然係雙雙被趕出場啦。文仙尼踢波嗰陣雖然意氣風發，但年紀咁輕就做大會教練，其實未必係好事，最後佢愈講愈冇嚟神氣，只係淡然表示「以小組次席為目標」，真係冇癮！
話就話國米𠵱家係意甲榜首隊啫，但球隊喺歐冠盃踢得咁差，又俾意大利傳媒猛插，唔怪得即刻有消息話文仙尼個教練位坐唔耐啦！
「國米想威足意甲同歐冠盃嘅話，我求大俠就勸佢哋搵個經驗夠啲嘅教練，畢竟，國米??家粒粒皆星，唔係人人可以鎮得住，如果再係咁，隨時又嚟場『軍事政變』都似！