【本報訊】本周二晚力撐新歡和髮妻長子對打的中年士多老闆，不理外間指摘他是「現代陳世美」，繼續向新歡發表愛的宣言。他自言「命帶桃花、劫數難逃」，不介意享受齊人之福。「其實我同佢（新歡）係真心㗎，我唔係啲沙沙滾嘅人，我唔係係女人都啱㗎，追我，我都唔要。」
記者昨再到汀角路士多找盧老闆，他表現激動，但一時說老婆打人，一時又說老婆被打。問清楚原來他同時稱姓黃髮妻和姓呂的新歡做老婆，後來便醒目地用「大婆」和「細婆」稱呼二人。他埋怨報道令人以為他很「花弗」，亦希望澄清當晚是長子阿立動手在先，還抬出呂多對被人破壞的鞋子，指有人搞事。
對於新歡，盧表現細心，昨日一早帶了多隻熟雞蛋到醫院探望呂。他覺得和呂「很夾」，至於黃，則是「一起捱了多年的女人」，故他亦不想離婚。盧自覺對黃不薄，閒時會一起到茶樓，又會買雞精燕窩給她。「買親都一千幾百㗎，嗰啲唔係錢嚟嘅咩！」
正在留院的呂，見盧前來探她當然開心。她深情望着盧，忍不住哭起來：「佢同我講，後生嗰時已經想要個好似我咁嘅老婆，我對佢好重要。」看到細婆流淚，盧亦不忍替她拭淚。盧自知有婚外情理虧，說稍後會跟大婆講對不起。但當他和記者到病房找髮妻時，他就像路人甲，除了開場白問候大婆要不要吃東西外，之後一直沒出聲。黃不斷數臭他和「狐狸精」，甚至罵他「現代陳世美」，他也沒駁嘴，一直假裝睡着了。
「都唔知畀咩迷湯佢飲」
黃借向記者細訴辛酸史時「單打」丈夫：「都唔知畀咩迷湯佢飲，飲到佢瘟瘟沌沌。人哋做保險㗎，食咗你都唔知啦！我幫你做咗三十幾年，咁都唔知足！」據黃說，丈夫嫌她「識做，識捱，但唔識溫柔」，已非首次有外遇，91年和96年亦曾發生婚外情，但浪子肯回頭。盧聽到髮妻講及兩人如何捱世界，不禁眼濕濕，推說很疲倦借故離開。
一想到丈夫包二奶後滿臉春風，黃依然未消氣。她和長子發現呂駐士多儼如「事頭婆」般看舖，打算趕走她，怎料丈夫竟說「你哋唔好搞佢呀，佢係我老婆嚟㗎！」她便當着夫面前，摑了呂三巴。至今，黃仍不忿遭呂搶走丈夫：「如果佢係十八廿二，我條氣都順啲吖，佢又矮又唔係靚過我！」還問記者：「你覺唔覺得佢靚過我吖？」
互毆事件在網上世界引起熱烈討論，會員主要是為人妻子或母親的親子王國討論區，有網友咬牙切齒地說：「佢（呂性新歡）自己已經係受害者，但係仲要去搞亂人家的家庭，還以為自己係受到傷害，她真的不知所謂……」至於在HKCircle討論區，網友jennifer則為姓呂新歡抱不平：「點解有二奶嘅一定係衰人？你哋知人哋屋企發生咩事咩？」