揸住部PDA邊行街邊Check住邊處有嘢食、有嘢玩唔係唔好，之不過部機好似牛龜咁大，加上好多電子地圖都要收費單撈，咁就未必個個都花費得起！啱啱諾記就公布咗旗下07年旗艦機──N-Series最強之作N95，佢最巴閉嘅唔單止係鏡頭已提升至500萬像素咁勁，仲成為首部內置GPS（全球定位系統）嘅趟蓋手機，方便至輕輕力用手指公推開機蓋即搵靚景，拎住去陽光與海灘，實在寫意！
記者、攝影：陳國輝
杭州直擊Nokia07新機發布會
今次諾記分別於紐約及杭州兩地舉行發布會，除共同發表N95呢款07年大作外，仲公布N-Series包括N70、N73以及N93嘅黑色版本，以及由內置4GB提升為8GB容量嘅N91，總共五款咁多！諾記還罕有地公布兩款專攻亞洲地區嘅音樂手機N5300及N5200。可能係分區舉行關係，現場並非想像中咁墟冚，中、港、台媒體加埋僅100人左右，難得唔使排長龍等玩，總算有大把時間慢慢試。
向下推變導航器
N95屬於第一部行Symbian系統嘅正式GPS手機，查實以前都出現過miniGPS軟件，不過佢係靠網絡發射站計算位置，論準確程度及功能而言，同「真正」GPS衞星導航可謂差一大截！今次現場所見，就提供咗巴黎及意大利部份城市地圖俾大家試用，據講正式出街時，玩家仲可免費上網單撈地圖，僅收取傳輸費咁話，認真抵玩！功能方面大致跟平時用開嘅PDA版冇分別，值得一提係操作上會學番N95咁用方向掣以及兩邊功能鍵，只要將Keypad向下推，即變身成導航器！但由於唔支援Touch-Screen，假如想點選地圖上某一點，或者放大或縮細，肯定會比PDA花上較多時間。
向上推靚歌即播
咪以為推蓋只係將數字鍵盤Show出嚟咁簡單，今次N95可謂玩盡呢種Sliding概念，除咗向下推啓動GPS外，仲可向上推打開影音播放器，個Design仲出位過韓Phone㖭！呢個2.6"Wide芒平時就用嚟操作手機功能或者睇地圖，但當你向上推嗰陣，影音專用鍵就即刻浮出嚟，同時畫面會由直變橫向顯示，十足PDA手機咁款，用嚟聽歌揀歌固然方便，但係有埋大芒俾你睇戲，咁就更加爽！至於你唔推蓋嗰陣一樣可當DC用，內置500萬像素蔡司認證鏡頭搭自動對焦，質素有保證，衰在佢冇跟番N93咁具備光學變焦。
女士對Pro機改觀
睇見N-Series由激厚玩到纖薄，加上現場公布咗幾款Mini音樂手機，睇嚟高階機一樣可成為女士心目中杯茶！小記喺現場就問咗幾位靚女意見，佢哋對呢批新機究竟有乜Comment呢？
Phoebe
「用慣韓式薄身趟機，從來都冇考慮換部High-TechPDA手機，但呢次見到N95的確幾薄，仲改變咗我對N系嗰種大牛龜印象㖭！」
Suki
「我用緊諾記入門機，如果有錢換都會揀部N5300，一來外形可愛夠細部，二來推蓋嗰陣好順手，冇卡住嘅感覺。」
周小姐
「預咗像素愈玩愈勁，但冇諗過非PDA手機一樣配備GPS，今次N95仲內置埋電子地圖，可以慳番啲錢同時間去下載喎！」
N95PROFILE
制式：WCDMA/GSM四頻
體積：99×53×19mm
重量：120g
屏幕：2.6"（1,600萬色）
通話時間：160（3G）分鐘
210（2.5G）分鐘
備用時間：215小時
主要功能：500萬像素相機、內建GPS及電子地圖、HSDPA傳輸速度、內置Wi-Fi、推蓋式音樂掣、MicroSD記憶卡
同場加映
夜場另一新機蒲頭 N5300變音樂番梘
雖然發布會由中午兩點半已經開始，但直落夜晚，喺杭州大劇院入面仲有個MiniConcert，表演者包括台灣歌手潘瑋柏，以及一班喪跳花式舞嘅舞林高手，但地方唔大，現場環境幾乎迫爆！不過，一線主角都唔係佢哋，而係另外兩款外形的骰嘅番梘音樂手機。齋睇機側兩排按鍵，已估到佢專攻Music，整體規格唔算好勁，但講到玩坼聲，佢的確同SE、三星機有得揮；至於另一款外形近似嘅N5200，據聞只限大陸發售，分別在於鏡頭及畫質都偏向入門級，但售價較N5300平500歐元（約港幣$5000）。
PROFILE：
GSM三頻、26萬色芒、130萬像素相機、音樂專鍵、MicroSD卡
夜場花絮
