霍震霆與朱玲玲嘅童話婚姻原來多年前已經破裂，只見霍Sir依然頻撲為北京奧運奔波，好似噚日佢喺中環中銀大廈，出席中銀Visa奧運版信用卡活動，心情都幾好，仲同兩屆奧運羽毛球金牌得主高崚打番幾球「友誼波」。八方知霍Sir打網球了得，原來佢羽毛球亦有板有眼。
霍Sir見到大班記者圍攻，已經十分醒目，主動要求記者只可以問有關體育問題，有個行家唔知攞景定贈興，問佢有冇同前妻打過羽毛球？搞到佢即時造手勢示意唔好再問。至於問到係咪搬離霍家大宅，同埋會否公開宣布與朱玲玲離婚，佢都話私人問題唔答，只談體育。其實朱玲玲咁鍾意打羽毛球，我諗霍Sir都可以約埋得閒打番場波，切磋吓球技當敍舊嘛。