泰國餐廳「金不換」侍應Dorothy好Happy，皆因返工久唔久就轉制服，相入面嗰套制服就係今年冬裝，採訪當日第一日試着咋，金黃色望落又幾Sharp喎，感覺如何？「比夏天套制服厚啲，都係外套一件，一笠上身就掂，幾舒服幾方便。不過呢，件衫個膊頭位加咗個墊呀，膊頭睇上去橫咗，搞到我好似《少林足球》入面個趙薇咁呀，哈哈。」咦？退後幾步睇又真係幾似趙薇着泰國衫喎。
原本嗰套夏天制服呢？「都有唔少人讚㗎，好似淺藍色嗰套就最多外國人讚夠Sharp，我自己就最鍾意海藍色嗰套喇，夠斯文嘛！之後仲着過紫色同紅色制服，平時一行出餐廳外面，就會有好多人望住晒。」問番至知，原來侍應制服全部嚟自泰國，一入職店方就會同員工度身，泰國師傅收到尺寸就會訂製衣服，上衣用麻布製成，上面有刺繡圖案，最過癮係每個侍應都有個袋仔裝住部落Order用嘅Palm，既有泰國Style又夠In。着起覺唔覺得自己似個泰國人呢？「都會㗎，我講多幾句泰國話，仲似泰國人㖭呀。」記者：蘇振鵬
攝影：林栢鈞
青芒絲軟殼蟹$88
每碟兩隻軟殼蟹，沾薄粉炸，多膏香口，鋪面嘅泰國青芒絲混入香茅片、南薑、檸汁、檸檬葉、蝦米、指天椒、魚露、青葱一齊炒，酸酸辣辣口感好豐富。
柚子蝦沙律$72
柚子拆肉混葱片、花生碎、炸亁椰絲、椰汁，再加新鮮大蝦煮成。中秋時節柚子當造，清甜多汁，係道清新開胃嘅前菜。
青咖喱雞肉炒飯$65
自創菜式，今日首次推出，用泰國一級青咖喱膏，配珍珠笋、西蘭花、草菇、甘笋片、金不換、雞髀肉一齊炒，飯唔會太亁身，青咖喱本身辣味溫和，無紅咖喱咁濃咁杰，我極力推介。
金不換泰國餐廳（28901993）
地址：銅鑼灣波斯富街99號利舞臺廣場6樓C、D舖